Truailliú aeir

Rialacha

Tionscadail a éilíonn Ceadúnas um CRCT

• Mianraí – baint, táirgeadh agus próiseáil amhaispeiste, baint ocsaíd alúmanaim ó mhian, baint agus próiseáil mianraí (is iad mianraí gach substaint laistigh den thalamh, ar an talamh nó faoin talamh, seachas móin) agus stóráil dramhaíl mianraí bainteacha agus baint móna i gcúrsa gnó ag a bhfuil baint le limistéar níos mó ná 50 heicteár.
• Fuinneamh - úsáid gáis, guail, ola, nó móna le haghaidh fuinneamh a tháirgeadh i monarcha dócháin ag a bhfuil a hionchur rátaithe teirmeach cothrom le nó níos mó ná 50MW (níl feidhm aige seo sa chás go mbaineann an mhonarcha úsáid dhíreach as na dtáirgí dócháin sa phróiseas monaraíochta) agus dó gáis guail, ola nó móna i gcoire nó i bhfoirnéis ag a bhfuil aschur ainmniúil teasa níos mó ná 50MW.
• Miotail - iarann, cruach, antamón, arsanaic, beirilliam, cróimiam, luaidhe, maignéisiam, mangainéis, fosfar, seiléiniam, caidmiam, mearcair, alúmanam, clóirín. Le haghaidh sonraí ar leith, déan teagmháil leis an nGCC.
• Snáithíní mianraí agus gloine
• Ceimiceáin (baineann sé seo le tionscadail a tháirgeann ceimiceáin agus le stóráil cainníochtaí áirithe meitil acrylate (20 tonna), aicrilinítríle (20 tonna), tolúéin dé-isocyanate (20 tonna), amóinia ainhidriúil (100 tonna) agus fluairíd hidrigine ainhidriúla (1 tonna).
• Diantalmhaíocht
• Bia agus deoch
• Adhmad, páipéar, teicstílí agus leathar
• Breoslaí iontaise (a thagraíonn do pheitriliam, gás nádúrtha, gual nó sceall biotúmanach, amhpheitriliam agus lignít)
• Stroighin
• Dramhaíl (aisghabháil agus diúscairt dramhaíola)
• Bratú dromchla (oibríochtaí leictreaphlátála, bratú le cumaisc orgánacha-stáin, monarú ábhar brataithe a úsáideann tuaslagóirí orgánacha agus déantúsaíocht bhrataithe phúdair)
• Eile (lena n-áirítear tástáil inneall, tuirbíní nó imoibreoirí sa chás go bhfuil achar an urláir níos mó ná 500 méadar chearnacha, ciorcaid iomlánaithe agus cláir chiorcad priontáilte a mhonarú, aol a tháirgeadh in áith agus ceirmigh gharbha a tháirgeadh lena n-áirítear brící teasfhulangacha, píopaí cruachré, brící fásála agus urláir agus tíleanna dín

Údaráis áitiúla

De réir an Achta um Thruailliú Aeir, 1987, tá sé de dhualgas ar údaráis áitiúla aon bheart a dhéanamh chun truailliú aeir a chosc nó a theorannú ina gceantar de réir mar is gá agus ní mór d’úinéirí na monarchana tionsclaíochta áirithe ceadúnas truaillithe aeir a fháil óna n-údarás áitiúil nó ón nGníomhaireacht um Chaomhnú Comhshaoil chun tionscadail áirithe, atá freagrach as a gcuid astúcháin, a fheidhmiú. Tá socruithe ceadúnais ar leithligh ag an nGCC agus ag údaráis áitiúla agus níl ar chuideachtaí iarratas a dhéanamh ar an mbeirt acu.

Tá ról lárnach ag na húdaráis áitiúla i dtruailliú aeir a chosc agus a chomhrac. Cuimsíonn sé seo:

• Monatóireacht a dhéanamh ar astúcháin nó ar an aer comhthimpeallach sa cheantar
• Measúnú a dhéanamh ar chomhlíonadh na reachtaíochta ábhartha
• Déileáil le gearáin maidir le truailliú aeir
• Catagóirí áirithe tionsclaíochta a cheadúnú
• An toirmeasc ar mhargaíochta, dáileadh agus díol bhreosla toirmiscthe (gual biotúmanach de ghnáth) a chur i bhfeidhm
• Taighde maidir le chúiseanna le truailliú aeir, méid truaillithe aeir, agus cosc ar thruailliú aeir a eagrú agus a dhéanamh
• Cláir oideachais a bhunú agus a reáchtáil maidir le truailliú agus cosc a chur air
• Tacú nó cabhrú le duine ar bith atá ag tabhairt faoi thaighde, suirbhé, nó iniúchadh ar bith maidir le cineál agus méid, nó cúis agus éifeacht truaillithe aeir nó cosc a chur ar thruailliú aeir, nó é a theorannú

Pionóis faoin Acht um Thruailliú Aeir

Tá cumhacht ag údaráis áitiúla pionóis de bharr shárú an Achta um Thruailliú Aeir (1987) a chur i bhfeidhm. Tá aon duine a sháraíonn forálacha an Achta ciontach i gcion agus d’fhéadfadh na pionóis seo a leanas a ghearradh air:

Ciontú achomair sa Chúirt Dúiche: fíneáil nach mó ná € 1,270 (mar aon le fíneáil nach mó ná € 127 in aghaidh gach lae a leanfar den chion) nó príosúnacht ar feadh aon téarma nach faide ná 6 mhí. Má chinneann an chúirt, d'fhéadfaí fíneáil agus príosúnacht araon a ghearradh ort.

Ciontú nó díotáil sa Chúirt Dúiche: fíneáil nach mó ná € 12,700 (chomh maith le fíneáil nach mó ná € 1,270 in aghaidh gach lae a leanfar den chion) nó príosúnacht ar feadh aon téarma nach faide ná 2 bhliain. Arís, má chinneann an chúirt, d'fhéadfaí fíneáil agus príosúnacht araon a ghearradh ort.

Is féidir le húdarás áitiúil fógra a sheirbheáil ar aon duine a chinneann siad go bhfuil sé ag briseadh an dlí faoin Acht um Thruailliú Aeir. Sonróidh an fógra seo na bearta ceartaitheacha atá le déanamh chun cosc a chur ar thruailliú aeir agus teorainn ama ina gcaithfidh na bearta seo a dhéanamh. Cé go bhfuil na húdaráis áitiúla freagrach as forfheidhmiú an Achta um Thruailliú Aeir ina gceantar féin, is féidir leo áitreabh atá ag truailliú na háite seo a ionchúiseamh, fiú má tá an truailliú ag teacht ó fhoinse lasmuigh dá ndlínse. Má mheasann údarás áitiúil go bhfuil duine aonair nó cuideachta tar éis neamhaird a dhéanamh de na rabhaidh agus na moltaí, is féidir leo cás a thógáil chuig an Ard-Chúirt go díreach. Is féidir leis an Ard-Chúirt urghaire a eisiúint, a thugann cead don údarás áitiúil déileáil leis an staid go láithreach. De ghnáth, ní úsáidtear an bealach seo ach amháin i gcásanna a bheidh ina riosca tromchúiseach do shláinte an phobail nó an comhshaol. De réir an Achta um Thruailliú Aeir, tá sé de dhualgas ar chuideachtaí úsáid a bhaint as na bealaí infheidhmithe ar fad chun thruailliú a theorannú agus, más féidir, a chosc óna n-áitreabh féin.

Monatóireacht

Tá leibhéil inghlactha truailleán áirithe san aer agus modhanna monatóireachta leagtha amach i dTreoracha an AE agus i rialacháin náisiúnta atá bunaithe ar na treoracha seo. Is gá do gach údarás áitiúil monatóireacht a dhéanamh ar cháilíocht an aeir le haghaidh na dtruailleán ar an mbealach céanna ionas gur féidir na torthaí ar fud na tíre agus ar fud an AE a chur i gcomparáid lena chéile. Leagann treoracha maidir le cáilíocht an aeir is déanaí na luachanna teorann amach atá le baint amach faoi 2005 nó 2010, ag brath ar an truailleán, agus leagann siad síos monatóireacht, measúnú agus cur chuige bainistíochta chun a chinntiú nach sáraítear na teorainneacha sin. Seolfar na torthaí monatóireachta go léir ó údaráis áitiúla ar aghaidh chuig an GCC, a áiríonn siad ina tuarascáil bhliantúil. Foilsíonn roinnt de na húdaráis áitiúla sonraí maidir le truailliú aeir ina gceantair féin ina dtuarascálacha bliantúla chomh maith. Foilsítear na tuarascálacha seo ar láithreáin Ghréasáin na n-údarás áitiúil den chuid is mó. Mura bhfuil an tuarascáil ar fáil san fhoirm sin, beidh sé foilsithe i bhfoirm cruachóipe agus ba chóir go mbeadh sí ar fáil ó do leabharlann áitiúil. Is féidir leat dul i dteagmháil le Rannóg Comhshaoil d’Údarás Áitiúil chun cóip saor in aisce den tuarascáil seo a fháil.

Limistéir faoi Rialú Speisialta

Is féidir le húdarás áitiúil ceantar a dhearbhú mar limistéar faoi rialú speisialta chun truailliú aeir a chosc nó a theorannú.

I 1990, dearbhaíodh ceantar iomlán Bhaile Átha Cliath (Cathair Bhaile Átha Cliath, Fine Gall agus Dún Laoghaire/Ráth an Dúin) mar limistéar faoi rialú speisialta agus tugadh cosc ar mhargaíocht, ar dhíol agus ar dháileadh breosla biotúmanaigh isteach chun toitcheo geimhridh a mhaolú. Ó shin i leith, cuireadh 11 cheantar eile san áireamh sa toirmeasc. Dearbhaíodh Cathair Chorcaí mar limistéar faoi rialú speisialta i 1995. Idir 1998 agus 2000, dearbhaíodh 10 gceantar eile mar limistéar faoi rialú speisialta agus cuireadh san áireamh iad sa toirmeasc breosla - An tInbhear Mór, Droichead Átha, Dún Dealgan, Luimneach, Loch Garman, Cill Droichid, Gaillimh, Léim an Bhradáin, An Nás agus Port Láirge. Baineann an toirmeasc le limistéir chomhthógtha uirbeacha ina bhfuil truailliú ina fhadhb agus ní hionann na limistéir seo agus teorainneacha bailte, cathracha nó contaetha i gcónaí. Mar shampla, tá an toirmeasc i gcathair Luimnigh i bhfeidhm i gcuid de Chontae an Chláir chomh maith agus cuimsíonn ceantar Dhroichead Átha Contae na Mí beagán.

Le haghaidh shonraí maidir leis na ceantair lena mbaineann na toirmisc, ba chóir duit dul i dteagmháil le d'údarás áitiúil. Léiríonn anailís ar thorthaí monatóireachta ar chaighdeán an aeir feabhsú suntasach ar chaighdeán an aeir sna ceantair seo ó dearbhaíodh mar limistéir faoi rialú speisialta iad. Déanann údaráis áitiúla seiceálacha ar an láthair ar mhiondíoltóirí breosla chun comhlíonadh leis an toirmeasc a chinntiú agus ba chóir gearáin faoi dhó ábhar neamhúdaraithe a chur in iúl d'údarás áitiúil. Ní chion é breosla toirmiscthe a dhó agus ní féidir tú a ionchúiseamh dá bharr. Ní bhaineann an reachtaíocht ach amháin leo siúd a dhíolann an breosla.

De bharr go bhfuil ról leathnaithe ag an nGCC i monatóireacht agus measúnú ar chaighdeán an aeir, is féidir léi gá le bearta rialaithe i réimse áirithe a aithint chun cloí leis na caighdeáin 2005 nó 2010, agus bheadh ar an údarás áitiúil na bearta sin a thabhairt isteach trí phlean bainistíochta cáilíocht aeir. Tar éis na gcaighdeán cáilíochta aeir nua a chur i bhfeidhm, d’fhéadfadh sáruithe de na luachanna teorann a thitim amach fós sa ghearrthéarma faoi choinníollacha áirithe. Má aithnítear a leithéid de rioscaí, d’fhéadfadh go mbeadh ar an t-údarás áitiúil plean gníomhaíochta gearrthéarmach a fheidhmiú chun na leibhéil truailleáin a choimeád laistigh de na teorainneacha atá leagtha síos. Is féidir leis an an bplean cosc a chur ar thrácht mótair ar feadh tréimhse ama sa limistéar bainteach sa chás go bhfuil trácht ag cur leis an bhfadhb.