Scéim Fhostaíochta Pobail

Rialacha

Tá 2 chatagóir Fostaíochta Pobail difriúla agus bíonn a riachtanais iontrála féin ag ‘chaon cheann acu. Is iad na catagóirí ná an Rogha Chomhtháite Pháirtaimseartha agus an Rogha Phoist Páirtaimseartha.Is féidir leat páirt a ghlacadh ceachtar iontu ach ní féidir leat páirt a ghlacadh sa bheirt ag an am céanna. Pleanálfaidh agus bainisteoidh urraí an chláir – eagraíochtaí nó grúpaí áitiúla – do shocrúchán. D'fhéadfadh sé freisin go gcuirfidh an t-urra deiseanna traenála nó forbartha scileanna ar fáil duit le linn na scéime.

Ar an meán is 39 uair an chloig oibre a dhéantar sa choicís don scéim. Íocann an t-urra na rannpháirtithe go seachtainiúil agus más cuí baintear cáin agus ÁSPC as an bpá. Tá do phá FP díolmhaithe ón Muirear Sóisialta Uilíoch.

An Rogha Chomhtháite Pháirtaimseartha

Ceadaíonn an Rogha Chomhtháite Pháirtaimseartha thú chun obair faoin scéim fostaíochta pobail suas go bliain amháin.

Seans gur féidir scéim bliana a fhadú bliain amháin eile ag brath ar do riachtanais féin, chun é seo a dhéanamh caithfidh an t-urra iarratas i scríbhinn a chur isteach chuig FÁS ar a laghad dhá mhí roimh dheireadh do scéime. Go hiondúil críochnaíonn na rannpháirtithe an sochrúchán bliana agus téann siad ag lorg post lán nó páirtaimseartha in áiteanna eile bunaithe ar an taithí atá faighte acu, ar an dea-ainm atá faighte acu le fostóirí áitiúla agus aon scileanna nua atá foghlamtha acu le linn na scéime.

Is féidir leat a bheith cáilithe le páirt a ghlacadh sa Rogha Chomhtháite Pháirtaimseartha den Scéim Fhostaíochta Pobail má:

Tá tú 25 bliain d'aois nó níos sine agus:

• Dífhostaithe agus ag fáil Shochar Cuardaitheora Poist (SCP), Liúntas Cuardaitheora Poist (LCP), Íocaíocht Teaghlaigh Aontuismitheora (ITA), Sochar Banchéile Thréigthe, Phinsean Neamh-Ranníocach Baintrí, Baintrí Fir nó Pháirtnéara Shibhialta Mharthanaigh, Phinsean Ranníocach Baintrí, Baintrí Fir nó Pháirtnéara Shibhialta Mharthanaigh nó Chúnamh Feirme ar feadh bliain amháin ar a laghad. (Má bhí tú ag fáil Liúntas Cúramóra, is féidir é seo a áireamh i gcomhair do thréimhse incháilitheachta bhliain amháin, ach ní mór do do chúraimí cúramóra a bheith críochnaithe agus ní mór duit a bheith ag fáil SCP, LCP nó ITA faoi láthair.)
• 1s cleithiúnaí fásta thú ag duine a bhfuil Liúntas Cuardaitheora Poist, Sochar Cuardaitheora Poist nó Cúnamh Feirme á fháil aige/aici ar feadh bliana ar a laghad - féach 'Babhtáil chleithiúnaí aosaigh' thíos

NÓ

Tá tú atá 18 mbliana d'aois nó níos sine agus:

• Is ball den Lucht Siúil tú, dífhostaithe agus ag fáil Shochar Cuardaitheora Poist, Liúntas Cuardaitheora Poist nó Íocaíocht Teaghlaigh Aontuismitheora ar feadh bliain amháin ar a laghad. Beidh daoine den Lucht Siúil aois 16 agus 17 a chaith 12 mhí in Ionad Oiliúna do Thaistealaithe incháilithe freisin.
• Ag fáil Liúntais Míchumais nó Pinsin na nDall.
• Ag fáil Pinsin Easláinte nó ag fáil Shochar Breoiteachta ar feadh 6 mhí ar a laghad. Caithfidh tú cead a fháil ón Roinn Coimirce Sóisialaí páirt a ghlacadh in obair athshlánaithe.
• Is dídeanaí tú atá fíordheimhnithe ag an Roinn Dlí agus Cirt agus Comhionannais (Teastas clárúcháin na nGardaí le stampa 4) agus ag fáil íocaíocht leasa shóisialaigh.
• Is iar-chiontóir thú atá curtha chuig an Scéim Fostaíochta Pobail ón tSeirbhís Phromhaidh nó is iar-chiontóir thú nach bhfuil curtha ón tSeirbhís Phromhaidh agus ag fáil SCP nó LCP ar feadh bliain amháin.
• Atreoraithe ag an Tascfhórsa Drugaí.
• Ag maireachtáil i gceann de na hoileáin mhara.

Nuair is cuí, is féidir le hiarrthóirí am a chaitheadar ar chláir aitheanta traenála nó fostaíochta a chur san áireamh chomh maith leis an tréimhse ama ag fáil liúntas ar mhaithe leis na riachtanais incháilithe a shásamh.

An Rogha Phoist Páirtaimseartha

Cuirtear an Rogha Phoist Páirtaimseartha obair pháirtaimseartha ar fáil ar feadh tréimhse suas le 6 bliana dóibh siúd ar sinne iad ná 55 agus suas le 3 bliana dóibh siúd atá faoi 55 bliana d'aois. An aidhm atá leis an rogha ná fostaíocht a chur ar fáil ar feadh tréimhse réasúnta fadtéarmach do dhaoine meánaosta nach raibh in ann fostaíocht sheasta a fháil le tamall anuas. Tá na teorainneacha rannpháirtíochta do dhaoine faoi mhíchumas 7 mbliana i gcás daoine idir 55 agus 65 bliain d'aois agus 4 bliana dóibh siúd atá idir 34 agus 54. Ní áirítear am caite ar FP roimh 3 Aibreán 2000 sna teorainneacha rannpháirtíochta seo.

D'fhéadfadh sé go mbeadh tú incháilithe don Rogha Phoist Páirtaimseartha FP má:

Tá tú 35 bliana nó níos sine agus:

• Tar éis a bheith ag fáil Shochar Cuardaitheora Poist (SCP), Liúntas Cuardaitheora Poist (LCP), Íocaiocht Teaghlaigh Aontuismitheora (ITA), Sochar Banchéile Thréigthe, Phinsean Ranníocach Baintrí, Baintrí Fir nó Pháirtnéara Shibhialta Mharthanaigh, Phinsean Neamh-Ranníocach Baintrí, Baintrí Fir nó Pháirtnéara Shibhialta Mharthanaigh nó Chúnamh Feirme ar feadh 3 bliana ar a laghad. (Má bhí tú ag fáil Liúntas Cúramóra, is féidir é seo a áireamh le do thréimhse incháilitheachta 3-bliana, ach ní mór do do chúraimí cúramóra a bheith críochnaithe agus ní mór duit a bheith ag fáil SCP, LCP nó ITA faoi láthair.)
• Ag fáil Liúntas Míchumais nó Pinsean na nDall.
• Ag fáil Pinsean Easláinte nó ag fáil Sochar Breoiteachta ar feadh 6 mhí ar a laghad. Caithfidh tú cead a fháil ón Roinn Coimirce Sóisialaí páirt a ghlacadh in obair athshlánaithe.
• Is iar-chiontóir thú atá curtha chuig an Scéim Fhostaíochta Pobail ón tSeirbhís Phromhaidh nó is iar-chiontóir thú nach bhfuil curtha ón tSeirbhís Phromhaidh agus ag fáil SCP nó LCP ar feadh 3 bliana.
• Is cleithiúnaí fásta thú ag duine a bhfuil Liúntas Cuardaitheora Poist, Sochar Cuardaitheora Poist nó Cúnamh Feirme á fháil aige/aici ar feadh 3 bliana nó níos mó - féach 'Babhtáil chleithiúnaí aosaigh' thíos

NÓ

Má tá tú 18 mbliana d’aois nó níos sine agus:

• Is ball den Lucht Siúil tú, ag fáil Shochar Cuardaitheora Poist, Liúntas Cuardaitheora Poist nó Íocaíocht Teaghlaigh Aontuismitheora ar feadh bliain amháin ar a laghad. Beidh daoine den Lucht Siúil aois 16 agus 17 a chaith 12 mhí in Ionad Oiliúna do Thaistealaithe incháilithe freisin.
• Is teifeach thú, aitheanta ag an Roinn Dlí agus Cirt agus Comhionannais.
• Atreoraithe ag an Tascfhórsa Drugaí.
• Ag maireachtáil ar cheann de na hoileáin mhara.

Babhtáil chleithiúnaí aosaigh

Má tá SCP, LCP nó Cúnamh Feirme á fháil agat agus tú incháilithe do FP, is féidir leat d’incháilitheacht a aistriú chuig do chleithiúnaí aosaigh. Ní chaillfear liúntais ar bith má bhaineann duine leas as an mbabhtáil chleithiúnaí aosaigh mar déantar cúinsí a aistriú lena chéile, a chiallaíonn go bhfuil na liúntais a bheadh faighte ag iarratasóir na Fostaíochta Pobail aistrithe chuig a gcleithiúnaí aosaigh. Tá sé tábhachtach do chleithiúnaí aosaigh síniú do chreidmheasanna ag an oifig leasa shóisialaigh áitiúil chun teidlíochtaí pinsean a chosaint.

Íocaíochtaí leasa shóisialaigh

Má fhaigheann tú Íocaíocht Teaghlaigh Aontuismitheora (ITA), d'fhéadfá cuid do d'ITA a choimeád - féach ár mbileog oibre maidir le ITA agus Fostaíocht Phobail. Má fhaigheann tú íocaíochtaí míchumais d'fhéadfá cuid do d'íocaíocht a choimeád, braithfear é ar íocaíocht. Má fhaigheann tú Pinsean Baintrí, Baintrí Fir nó Pháirtnéara Shibhialta Mharthanaigh (Neamh-Ranníocach) d'fhéadfá cuid do d'íocaíocht a choimeád. Áfach, má fhaigheann tú Pinsean Baintrí, Baintrí Fir nó Pháirtnéara Shibhialta Mharthanaigh (Ranníocach), is féidir d'íocaíocht a choimeád. Ba chóir duit dul i dteagmháil le d'Oifig Leasa Shóisialaigh Áitiúil chun do chúinsí ar leith a sheiceáil.

Tairbhí tánaisteacha

Coimeádfaidh tú do Chárta Leighis.

Coimeádfaidh tú teidlíocht ar liúntais thánaisteacha a bhí tú ag fáil díreach roimh dhul ar aghaidh go dtí Fostaíocht Pobail ar chuntar go sásaítear na coinníollacha le haghaidh na liúntais seo.

Liúntais Cíosa: laghdófar an méid Liúntais Cíosa a fhaigheann tú, áfach.