Ag tabhairt fógra le hathrú jabanna

Rialacha

Conradh fostaíochta

D’fhéadfadh conradh fostaíochta a bheith aontaithe le focal béil nó a bheith leagtha amach i scríbhinn. De réir an dlí is iad riachtanais maidir le fógra ar chuid de na nithe a chaithfidh a bheith i bhfoirm scríofa. Ba cheart duit, mar sin, na forálacha a bhaineann leis an bhfógra a chaithfidh tú a thabhairt a sheiceáil i do chonradh fostaíochta agus iad sin a leanúint. Meabhraigh gur féidir i gcónaí socrú eile seachas an ceann atá sa chonradh le d’fhostóir a dhéanamh.

Fógra íosta reachtúil

Muna bhfuil foráil i do chonradh fostaíochta a phléann fógra, tiocfaidh an fógra íosta reachtúil de sheachtain amháin i bhfeidhm agus is é seo an fógra ba cheart duit a thabhairt do d’fhostóir. Tá an fógra íosta reachtúil de sheachtain amháin leagtha síos in Alt 6 den Acht um Fhógra Íosta agus Téarmaí Fostaíochta 1973.

Cúinsí nuair nach bhfuil fógra ag teastáil

Má bhí fostaí ag obair d’fhostóir le haghaidh tréimhse níos lú ná 13 seachtaine nó sa chás go raibh an fostaí ciontach i dtaobh drochiompair thromchúisigh, ní chaithfidh an fostóir an fógra íosta de sheachtain amháin a thabhairt don bhfostaí.

Do cheart chun fógra a fháil a tharscaoileadh

Tá sé leagtha síos i reachtaíocht fhostaíochta in Éirinn gur féidir le fostaí a c(h)eart chun fógra a fháil a tharscaoileadh, má aontaíonn an fostóir agus an fostaí araon. Chomh maith leis sin, má aontaíonn an fostóir agus an fostaí, is féidir leis an bhfostóir an fostaí a íoc in áit fógra a thabhairt. Má ghlacann tú le híocaíocht in áit fógra, is é an dáta ar a mbeadh an fógra istigh (dá dtabharfaí é) an dáta ar a gcríochnaíonn d’fhostaíocht. Tá na cearta seo leagtha síos in Alt 7 den Acht um Fhógra Íosta agus Téarmaí Fostaíochta 1973.

Ní chlúdaíonn an reachtaíocht úsáid a bhaint as laethanta saoire nár tógadh (saoire bhliantúil) in ionad fógra scoir a thabhairt. Is ceist í seo ar chóir a shocrú idir an fostóir agus an fostaí. Ag an am céanna, bíonn fostaí a fhágann a phost i dteideal íocaíocht a fháil ar son aon saoire bhliantúil nár tógadh.

D’intinn a athrú

Ní féidir leat d’fhógra go bhfuil tú ag cur deireadh le d’fhostaíocht a tharraingt siar ach amháin má tá tú in ann é sin a shocrú le d’fhostóir.

Tá an fógra íosta reachtúil a chaithfidh fostaí a thabhairt le fáil sna hAchtanna um Fhógra Íosta agus Téarmaí Fostaíochta 1973 – 2001.

Teastais a fháil ó fhostóir agus tú ag fágáil poist

Agus duine ag athrú nó ag éirí as post, is minic a thugann an fostóir teastas t dó (nó bíonn sé sásta bheith mar mholtóir dó). Is moladh foirmiúil é teastas (a scríobhtar go hiondúil, ach d'fhéadfaí tagairt labhartha a thabhairt freisin) a thugann iarfhostóir d'ábhar fostóra. Is cur síos é an teastas ar cháilíochtaí, taithí agus iontaofacht an fhostaí. Ach, ní fholaíonn reachtaíocht fostaíochta na hÉireann aon cheart dlíthiúil chun teastas a fháil. Ciallaíonn sé seo nach bhfuil sé de cheart doshéanta agat teastas a fháil ó fhostóir agus tú ag fágáil poist. Cé nach bhfuil dualgas ar fhostóir teastas a thabhairt (nó bheith mar mholtóir), is féidir leo é sin a dhéanamh ar a ndiscréid féin.