Seachtain oibre

Eolas

I gcás go leor fostaithe, sonraíonn an tAcht um Eagrú Ama Oibre 1997 nach féidir 48 uair a chloig a shárú mar uasteora don tseachtain oibre ar an meán. Ní chiallaíonn sin nach bhféadfadh níos mó ná 48 uair a chloig a bheith i seachtain oibre, is é an meán a bhfuil tábhacht leis.

Is féidir an meán a ríomh ar cheann de na modhanna seo a leanas:

• De réir tréimhse 4 mhí, an chuid is mó d'fhostaithe
• De réir tréimhse 6 mhí i gcás fostaithe atá ag obair sa tionscal slándála, ospidéil, príosúin, gás/leictreachas, aerphort/duganna, talmhaíocht agus fostaithe i ngnónna a mbíonn tréimhsí níos troime ná a chéile iontu i rith na bliana ar nós turasóireacht.
• De réir tréimhse 12 mí sa chás go bhfuil aontú dá réir idir an fostóir agus na fostaithe. Ní foláir don Chúirt Oibreachais glacadh leis an gcomhaontú idir fostóir agus fostaithe.

Ní chuirtear sosanna, saoire bhliantúil, saoire tinnis ná saoire máithreachais/altranais/tuismitheoireachta san áireamh agus na 48 uair a chloig á ríomh. Leagtar amach sa reachtaíocht obair oíche, íostréimhsí sosa agus scíth chomh maith le forálacha maidir le obair Dhomhnaigh - féach thíos.

Eisceachtaí

Níl feidhm leis an Acht um Eagrú Ama Oibre 1997 am oibre agus tréimhsí sosa i gcás gach fostaithe. Níl feidhm leis an Acht um Eagrú Ama Oibre ina iomláine i gcás an Gharda Síochána, na Fórsaí Cosanta, fostaithe a rialaíonn a gcuid uaireanta oibre, ná fostaithe teaglaigh feirme nó tí. Tá na huaireanta oibre do dhaoine óg faoi bhun 18 mbliana d'aois rialaithe ag an Acht um Chosaint Daoine Óga (Fostaíocht) 1996.

Tá rialacháin ar leith ann a rialaíonn uaireanta oibre dochtúirí faoi oiliúint (SI 494 de 2004) agus fostaithe ag obair ar muir.

Tá díolúine faoi láthair ag daoine fostaithe in imeachtaí iompair (IR 20 de 1998) agus in earnálacha áirithe sna seirbhísí cosanta sibhialta (IR 52 de 1998) ó fhorálacha a bhaineann le uasteora don tseachtain oibre ar an meán agus tréimhsí sosa agus scíthe reachtúla.

Faisnéis a sholáthar maidir le huaireanta oibre

I gcás go leor fostaithe, tá na huaireanta oibre sainithe, mar shampla, ina gconradh fostaíochta nó in ERO nó REA. Mura sainítear na huaireanta oibre, faoi Alt 17 den Acht, ní mór don fhostóir an fostaí a chur ar an eolas maidir le huaireanta tosaigh agus críochnaithe ar a laghad 24 uair an chloig roimh an chéad lá nó an lá de gach seachtain a bhfuil ceangal ar an bhfostaí oibriú. Is féidir leis an bhfostóir é seo a dhéanamh trí fhógra a chrochadh in áit fheiceálach in ionad oibre an fhostaí ar lá go bhfuil an fostaí ag obair. Má iarrtar ar fhostóir uaireanta de bhreis a oibriú, ní mór an fógra 24 uaire a thabhairt ar an mbealach céanna. I gcúinsí gan choinne áfach, mar shampla fostaí eile a bheith as láthair de bharr tinnis, is féidir leis an bhfostóir iarraidh ar an bhfostaí oibriú le fógra níos lú ná 24 uaire.