Oideachas Tríú Leibhéil in Éirinn

Tá raon leathan institiúidí ann in Éirinn a chuireann oideachas tríú leibhéal ar fáil. Maoiníonn an Stát earnáil na n-ollscoileanna, an earnáil teicneolaíochta agus na coláistí oideachais go substaintiúil. Ina theannta sin tá roinnt coláistí príobháideacha neamhspleácha ann.

Is é an tÚdarás um Ard-Oideachas an ghníomhaireacht reachtúil atá freagrach as maoiniú na n-ollscoileanna, na bhforas teicneolaíochta agus roinnt institiúidí ardoideachais eile. Tá ról comhairleach aige maidir le hiomlán na earnála oideachais tríú leibhéal.

Earnáil na nollscoileanna

Tá formhór na n-ollscoileanna in Éirinn maoinithe ag an Stát, ach is gnách go mbíonn siad uathrialach. Is ollscoil phríobháideach é Coláiste Ríoga na Máinlianna in Éirinn (RCSI).

Is iad na hollscoileanna in Éirinn:

• Ollscoil Náisiúnta na hÉireann, arb éard atá inti brat-ollscoil a chumhdaíonn An Coláiste Ollscoile, Baile Átha Cliath (UCD), An Coláiste Ollscoile Gaillimh (UCG), Coláiste na hOllscoile, Corcaigh (UCC), agus Coláiste Phádraig i Maigh Nuad.
• Ollscoil Bhaile Átha Cliath, ar a dtugtar Coláiste na Tríonóide Baile Átha Cliath (TCD) de ghnáth.
• Ollscoil Luimnigh (UL)
• Ollscoil Chathair Bhaile Átha Cliath (DCU)
• RCSI Ollscoil an Leighis agus na nEolaíochtaí Sláinte

Earnáil teicneolaíochta

Áirítear leis an earnáil teicneolaíochta ollscoileanna teicneolaíochta (OTanna) agus institiúidí teicneolaíochta (ITanna).

Ceadaítear in Acht na nOllscoileanna Teicneolaíochta, 2018 d’institiúidí teicneolaíochta iarratas a dhéanamh go ndéanfar saghas nua d’institiúid ardoideachais díobh agus stádas ollscoil teicneolaíochta a bheith acu. Cuireann OTanna agus ITanna cláir oideachas agus oiliúna ar fáil i limistéir ar nós gnó, eolaíochta, innealtóireachta, teangeolaíochta agus ceoil ar leibhéil teastais, dioplóma agus chéime.

Tá 5 ollscoil theicneolaíoch ann:

• Ollscoil Teicneolaíochta Bhaile Átha Cliath (TU Baile Átha Cliath) – institiúidí teicneolaíochta Bhaile Átha Cliath, Thamhlachta agus Bhaile Bhlainséir roimhe seo
• Ollscoil Teicneolaíochta na Mumhan MTU) – institiúidí teicneolaíochta Chorcaí agus Thrá Lí roimhe seo
• Ollscoil Teicneolaíochta na Sionainne: Lár-Iarthar Láir (TUS) – institiúidí teicneolaíochta Luimnigh agus Bhaile Átha Luain roimhe seo

• Ollscoil Theicneolaíochta an Atlantaigh (ATU) – institiúidí teicneolaíochta na Gaillimhe-Maigh Eo, Shligigh agus Leitir Ceanainn roimhe seo. Beidh cáilíochtaí ollscoile ag mic léinn a bhainfidh céim amach ó na hinstitiúidí sin in 2021-2022
• Ollscoil Teicneolaíochta an Oirdheiscirt (SETU) – institiúidí teicneolaíochta Cheatharlach agus Phort Láirge roimhe seo. Beidh cáilíochtaí ollscoile ag mic léinn a bhainfidh céim amach ó na hinstitiúidí sin in 2021-2022.

Tá 2 fhoras teicneolaíochta suite ar fud an tíre - i gceantar Bhaile Átha Cliath tá Dún Laoghaire agus tá ceann i nDún Dealgan.

Coláistí oideachais

Tá roinnt mhaith coláistí oideachais a chuireann sainoiliúint ar fáil do mhúinteoirí bunscoile. Tairgeann siad céim trí bliana Baitsiléara Oideachais agus dioplóma 18 mí iarchéime. De ghnáth déanann múinteoirí iar-bhunscoile bunchéim agus dioplóma iarchéime ina dhiaidh sin. Tá tuilleadh faisnéise le fáil inár ndoiciméad faoi cháilíochtaí múinteora.

Coláistí eile

Le cois na gcoláistí a mhaoiníonn an Stát, tá roinnt institiúidí oideachais tríú leibhéil ar tháille ann a chuireann cúrsaí ar fáil, go mór mór san oiliúint ghairmiúil phroifisiúnta agus sa ghnó. Tá cuid de na coláistí seo nasctha leis na hollscoileanna nó le comhlachais ghairmiúla agus féadfar a gcuid cáilíochtaí a chreidiúnú dá réir– féach anseo thíos.

An Creat Náisiúnta Cáilíochtaí (CNC): Córas 10 leibhéal é seo ar féidir dá bharr caighdeáin agus leibhéil na gcáilíochtaí a chur i gcomórtas le chéile. Tá léaráid den CNC ar láithreán gréasáin Dearbhú Cáilíochta agus Cáilíochtaí Éireann (DCCE). Tá na cáilíochtaí tríú leibhéal ar Leibhéil 6-10 sa Chreat.

Bronnadh cáilíochtaí

In earnáil na n-ollscoileanna is iad Ollscoil Náisiúnta na hÉireann (UCD, UCC, UCG agus Maigh Nuad), Ollscoil Bhaile Átha Cliath, Ollscoil Chathair Bhaile Átha Cliath, Ollscoil Luimnigh agus RCSI Ollscoil an Leighis agus na nEolaíochtaí Sláinte na fhoras cáiliúcháin. Déanann ollscoileanna teicneolaíochta (OTanna) a ndámhachtainí féin. Is í Dearbhú Cáilíochta agus Cáilíochtaí Éireann an foras cáiliúcháin d’institiúidí oideachais tríú leibhéil lasmuigh d’earnáil na n-ollscoileanna. Is í DCCE an foras cáiliúcháin don bhreisoideachas agus don oiliúint in Éirinn. Bronnann sí Ardteastais freisin (Leibhéal 6). Is féidir faisnéis níos mionsonraithe a fháil inár ndoiciméad faoi cháilíochtaí breisoideachais agus ardoideachais.

Na hollscoileanna: Bronnann na hollscoileanna atá ann cheana agus atá arna maoiniú ag an Stát a gcuid céimeanna féin agus cáilíochtaí eile. Cáilíonn mic léinn ollscoile le Gnáthchéim Bhaitsiléara (Leibhéal 7 CNC) nó le Céim Onóracha Bhaitsiléara (Leibhéal 8 CNC). Tairgeann na hollscoileanna Céimeanna Máistir (Leibhéal 9 CNC) agus Dochtúra (Leibhéal 10 CNC) iar-bhunchéime freisin.

An earnáil Teicneolaíochta: Déanann ollscoileanna teicneolaíochta (OTanna) a ndámhachtainí féin. Bronnann na hinstitiúidí teicneolaíochta eile céimeanna, dioplómaí agus teastais a dheimhníonn QQI. Go ginearálta, cáileoidh mic léinn OTanna agus ITanna le hArdteastas (Leibhéal 6 CNC) nó le Gnáthchéim Bhaitsiléara (Leibhéal 7 CNC). Bíonn Céimeanna Baitsiléara le hOnóracha (Leibhéal 8 CNC), Dioplómaí Iarchéime (Leibhéal 9 CNC) agus Ard-Dochtúireachtaí (Leibhéal 10 CNC) le fáil freisin.

Coláistí eile: De ghnáth bronnann na coláistí eile a fhaigheann maoiniú ón Stát cáilíochtaí a dheimhníonn DCCE. Bronnann na coláistí príobháideacha cáilíochtaí a ndeimhníonn ollscoileanna thar lear cuid díobh agus a ndeimhníonn DCCE cuid eile díobh. Ní dheimhníonn aon chomhlacht seachtrach cuid de na cáilíochtaí a bhronnann siad.

Tá an réimniú ar cheann de ghnéithe Chreat Náisiúnta na gCáilíochtaí. Go minic tugann teastas Leibhéil 6 arna bhronnadh ag DCCE an chaoi do mhac léinn leanúint ar aghaidh chun céime ar Leibhéal 7 nó Leibhéal 8. Tugann an Scéim Nasc Ardoideachais an chaoi dóibh siúd a bhfuil cáilíochtaí DCCE Leibhéil 5 agus Leibhéil 6 (CNC) acu dul ar aghaidh chun an ardoideachais. Féadfaidh tú tuilleach eolas faoin réimniú.

Má tá tú ag brath ar dhul ar coláiste féadfaidh tú an láithreán gréasáin Qualifax a chuardach le haghaidh mionsonraí ar na cúrsaí. De ghnáth, déantar na hiarratais ar chúrsaí fochéimí tríd an Lár-Oifig Iontrála (CAO). Féadfaidh tú a thuilleadh faisnéise a fháil inár gcuid doiciméad faoi ghnáthaimh iarratais agus riachtanais iontrála, faoi tháillí tríú leibhéal agus faoi fhaoiseamh cánach do tháillí tríú leibhéal. Gheofar faisnéis faoin staidéar iarchéime thíos.

Más dóigh leat go bhféadfadh teideal a bheith agat ar dheontas, gheobhaidh tú faisnéis i scéimeanna deontas cothaithe do mhic léinn ar chúrsaí tríú leibhéal agus deontais agus maoiniú le fáil ag mic léinn lánfhásta.

Is féidir mionsonraí teagmhála maidir le hinstitiúidí oideachais tríú leibhéil a fháil ar láithreán gréasáin na Lár-Oifige Iontrála.

Staidéar iarchéime

Ní mór duit machnamh a dhéanamh ar an gcineál staidéir iarchéime ba mhian leat a dhéanamh, ar na cúrsaí is oiriúnaí duit agus do do shlí bheatha agus na costais ghaolmhara. Is féidir le staidéar iarchéime a bheith ina chúrsa múinte nó bunaithe ar thaighde agus go ginearálta titeann sé isteach i gceann de na catagóirí seo a leanas:

• Dioplóma iarchéime: Is minic gur cúrsa gairmoideachais é seo, ceangailte le gairmeacha ar nós teagaisc nó leabharlannaíochta. Is féidir go mbeidh difríocht idir a ábhar agus ábhar na bunchéime.
• Céim mháistreachta: Is féidir leis seo a bheith ina chúrsa múinte nó bunaithe ar thaighde. Maireann sé de ghnáth 1-2 bliain agus baineann sé de ghnáth le hobair chúrsa agus tráchtas.
• PhD: Is dochtúireacht é seo a bhronntar ar thráchtas bunaithe ar thaighde. Glacann sé ar a laghad 3 bliana staidéir agus ní mór dó cur leis an eolas mar ábhar nuálach.

Staidéar iarchéime a chistiú

Go ginearálta, beidh ort táillí a íoc le haghaidh cúrsaí iarchéime. Is féidir go mbeidh tú in inmhe faoiseamh cánach a fháil ar na táillí. Má fuair tú deontas tríú leibhéil le haghaidh do chúrsa fochéime, is féidir go mbeidh tú incháilithe le haghaidh staidéir iarchéime in Éirinn, lena n-áiritear Tuaisceart na hÉireann.

Tá foinsí éagsúla cistithe do mhic léinn iarchéime. Bíonn tacaíocht airgeadais ar fáil in amanna ón ollscoil atá ag reáchtáil an chúrsa iarchéime; in amanna bíonn ort iarratas a chur isteach chuig grúpa seachtrach. Cuireann roinnt grúpaí taighde cistiú ar fáil le haghaidh taighde iarchéime in Éirinn, lena n-áirítear an An Chomhairle um Thaighde in Éirinn agus Fondúireacht Eolaíochta Éireann.

Deonaíonn rialtais eachtracha roinnt scoláireachtaí agus comhaltachtaí chun staidéar thar lear gach bliain do mhic léinn Éireannacha atá i mbun chúrsa oideachais tríú leibhéil, nó a bhfuil sé curtha i gcrích acu.

ou can find information about opportunities for postgraduate study abroad on the Department of Further and Higher Education website and on the European University Institute website.

Is féidir leat eolas faoi dheiseanna le haghaidh staidéar iarchéime thar lear a fháil ar láithreán gréasáin na Roinne Breisoideachais agus Ardoideachais agus ar láithreán gréasáin Institiúid Ollscoile na hEorpa. Más mian leat staidéar sa R.A tá láithreán gréasáin don R.A ar a dtugtar Prospects.

Iarratais agus eolas breise

Le haghaidh cúrsaí iarchéime go ginearálta cuireann tú iarratas isteach go díreach chuig an ollscoil nó chuig an coláiste. Is féidir leat teacht ar eolas faoi chúrsaí iarchéime agus ar iarratais ón oifig gairmeacha i do choláiste nó ollscoil. Má tá tú ag cur isteach ar chúrsaí iarchéime sa RA is féidir leat iarratas a dhéanamh ar líne ar ollscoileanna agus ar choláistí áirithe.