Cúrsaí tríú leibhéal do mhic léinn lánfhásta

Cé atá ina mac léinn lánfhásta?

Meastar gur mac léinn lánfhásta thú, de ghnáth, má tá tú 23 bliain d'aois ar a laghad an 1 Eanáir sa bhliain a thosaíonn tú do chúrsa agus má tá an coláiste á thosú agat den chéad uair.

Má thosaigh tú ach murar chríochnaigh tú do chúrsa, is féidir a mheas go fóill, amanna, gur mac léinn lánfhásta thú má tá tú 23 bliain d’aois nó níos sine. Ní bhfaighidh tú deontas mic léinn, áfach, murach gur ghlac tú sos den staidéar a dhéanamh ar feadh ar a laghad 5 bliana. Ba cheart duit fiafraí den choláiste inar mian leat staidéar a dhéanamh cén sainmhíniú atá acu ar mhac léinn lánfhásta.

Ag brath ar do chúrsa agus do chúinsí, b’fhéidir go gcáileoidh tú, mar mhac léinn lánfhásta, do dheontas mic léinn nó do chabhair le táillí. Féach ‘cláir rochtana ollscoile’ agus ‘Táillí a ghearrtar ar mhic léinn lánfhásta’ thíos.

Roghanna staidéir do mhic léinn lánfhásta

Staidéar lánaimseartha

Cuireann coláistí tríú leibhéal líon beag áiteanna ar leataobh do mhic léinn lánfhásta ar mian leo cúrsa lae lánaimseartha a dhéanamh. Má tá tú níos sine ná 23 bliain d’aois, is féidir leat iarratas a dhéanamh ar cheann de na háiteanna seo. Ciallaíonn seo go rachaidh tú san iomaíocht d’áit a fháil ar bhealach éagsúil leo siúd a bhfuil an scoil díreach á fágáil acu. Is teoranta do líon na n-áiteanna a chuirtear ar leataobh do mhic léinn lánfhásta, agus is dóchúil, dá bharr, go mbeidh ort dul san iomaíocht go fóill le do phiaraí.

*Ba cheart duit a sheiceáil leis an gcoláiste inar mian leat staidéar a dhéanamh cén sainmhíniú atá acu ar mhac léinn lánfhásta.

Má roghnaíonn tú cúrsa lánaimseartha ar an mbealach seo, beidh súil leis go bhfreastalóidh tú ar ranganna nó léachtaí gach lá agus déanfar measúnú ort ar an mbealach céanna a dhéantar ar na mic léinn eile i do chúrsa.

Cuireann go leor coláistí agus ollscoileanna imeachtaí eolais ar siúl do dhaoine ar mian leo staidéar a dhéanamh mar mhic léinn lánfhásta.

Tá féilire imeachtaí gairm bheatha a bhíonn ar siúl i gcaitheamh na bliana ar láithreán gréasáin Qualifax.

Roghanna páirtaimseartha

Mura mian leat staidéar lánaimseartha a dhéanamh, tá roghanna eile ar fáil, cúrsaí páirtaimseartha, cláir mhodúlacha agus cianfhoghlaim ina measc.

Má roghnaíonn tú staidéar a dhéanamh ar bhonn páirtaimseartha nó modúlach, is féidir leat do staidéar a shíneadh feadh roinnt blianta. Tugann seo an deis duit d’am a eagrú agus chun staidéar a dhéanamh nuair is áisiúla duit. Glacfaidh sé níos faide lena chríochnú ná cúrsa lánaimseartha, ach baineann an buntáiste leis go gceadaíonn sé duit oibriú ar do luas féin, agus creidmheasanna a ghnóthachtáil de réir a chéile i dtreo do cháilíochta.

Cláir mhodúlacha

Tá modúil ar leith i gclár modúlach - aonaid fhéinchuimsitheacha laistigh de chúrsa iad seo. Is féidir leat staidéar a dhéanamh agus gach modúl a chríochnú ar leithligh ag céimeanna éagsúla i rith an chúrsa sin. Is féidir le cláir mhodúlacha titim amach i ngnáthshuíomhanna seomra ranga nó is féidir leo bheith mar chuid de chlár cianfhoghlama. Bíonn cúrsaí modúlacha ar fáil ar leibhéal céime i roinnt ollscoileanna.

Cianfhoghlaim

Titeann cianfhoghlaim amach amuigh ón seomra ranga fisiciúil agus ón teagascóir. Cuimsítear réimse fairsing cláir foghlama ann. Má ghlacann tú páirt i gclár cianfhoghlama, b’fhéidir go n-úsáidfidh tú ábhair agus meáin éagsúla foghlama i rith do chúrsa.

D’fhéadfadh mic léinn teacht le chéile i roinnt cúrsaí chun staidéar a dhéanamh ar feadh lae, deireadh seachtaine nó seachtaine in aon am amháin.

Cláir rochtana ollscoile

Tá mar chuspóir ag cláir rochtana ollscoile rannpháirtíocht grúpaí a ndéantar tearcionadaíocht dóibh ar an tríú leibhéal a mhéadú. Tacaíonn siad le daoine fásta óga agus le mic léinn lánfhásta chun staidéar a dhéanamh ag coláistí tríú leibhéal.

B’fhéidir go gcáileoidh tú do dheontas mic léinn, má tá tú ag freastal ar chúrsa rochtana nó bonnchúrsa atá ar liosta cúrsaí faofa na Roinne Oideachais. Ní cháileoidh tú do dheontas, áfach, mura bhfuil an cúrsa ar an liosta cúrsaí faofa.

Má tá íocaíocht leasa shóisialaigh á fáil agat, b’fhéidir go mbeidh tú in ann páirt a ghlacadh i gcúrsa rochtana nó i mbonnchúrsa agus Liúntas um Fhilleadh ar Oideachas a fháil.

Ba cheart duit cláir rochtana a sheiceáil le do rogha ollscoile nó le do Bhord Oideachais agus Oiliúna áitiúil.

Riachtanais iontrála i gcoláiste do mhic léinn lánfhásta

Beidh ort d’Ardteistiméireacht a bheith críochnaithe agat, go ginearálta, chun freastal ar oideachas tríú leibhéal. Má tá iarratas á dhéanamh agat ar áit mar mhac léinn lánfhásta, áfach, ní iarrfar ort na gnáthriachtanais iontrála a shásamh.

Tá nósanna imeachta éagsúla iontrála ag cúrsaí éagsúla, ach is gnách go gcuirfidh coláistí do chúlra oideachais, stair oibre, rannpháirtíocht sa phobal agus éachtaí agus ábhair eile spéise san áireamh. Tugtar Creidiúnú Réamhfhoghlama ó Thaithí (APEL) nó Aitheantas Réamhfhoghlama (RPL) ar an gcóras seo.

Is áisiúil a dheimhniú an úsáidtear córas APEL i do rogha coláiste sula ndéanann tú iarratas.

Cuirtear eolas ar fáil ar láithreán gréasáin Qualifax faoi riachtanais iontrála do mhic léinn lánfhásta do chúrsaí fochéime lánaimseartha.

I roinnt cásanna, is féidir iarraidh ort scrúdú iontrála a dhéanamh.

Táillí a ghearrtar ar mhic léinn lánfhásta

Staidéar lánaimseartha

Má cháilítear thú don Tionscnamh Táillí Saor in Aisce, ní bheidh ort táillí a íoc i gcoláiste a chistítear go poiblí. Beidh ort an ranníocaíocht mhic léinn a íoc, áfach, murach go gcáilítear thú freisin don deontas mic léinn.

Má tá íocaíocht leasa shóisialaigh á fáil agat, b’fhéidir gur cheart duit a dheimhniú an gcáilíonn tú do Liúntas um Fhilleadh ar Oideachas.

Ní féidir leat an deontas mic léinn agus Liúntas um Fhilleadh ar Oideachas a fháil ag an am céanna, ach má tá tú incháilithe don dá rud, is féidir leat seiceáil cén ceann ar fearr duit cur isteach air.

Is féidir leat iarratas a dhéanamh ar fhaoiseamh cánach má tá tú ag íoc as an gcúrsa ó d’ioncam féin nó is féidir le duine éileamh a dhéanamh má tá táillí á n-íoc acu thar do cheann. Chun cáiliú don fhaoiseamh cánach ar do tháillí, caithfidh gur cúrsa faofa ag coláiste faofa atá i do chúrsa.

Oideachas páirtaimseartha, modúlach agus cianoideachas

Is gnách gur gá duit táillí a íoc do na cúrsaí oideachais páirtaimseartha, modúlacha agus cianoideachais go léir. Is éagsúil a bhíonn na costais ó chúrsa go cúrsa. Is féidir leat iarratas a dhéanamh, áfach, ar fhaoiseamh cánach má tá páirt á glacadh agat i gcúrsa faofa.

Conas iarratas a dhéanamh mar mhac léinn lánfhásta

Chun iarratas a dhéanamh ar chúrsa tríú leibhéal mar mhac léinn lánfhásta, ba cheart duit teagmháil a dhéanamh ar dtús le do rogha coláiste go díreach. Beidh eolas ar fáil ag an Oifig Iontrálacha nó ag an Oifigeach Mic Léinn Lánfhásta faoi aon riachtanais ar leith nó aon eolas breise is gá duit a sholáthar nuair a chuireann tú isteach ar do chúrsa. Bíonn riachtanais éagsúla aoise ag roinnt cúrsaí, mar sin, ba cheart duit a sheiceáil an mbaineann é seo.

Inseoidh an coláiste duit freisin más gá duit iarratas a sheoladh chuig an gcoláiste go díreach nó úsáid a bhaint as an bpróiseas iarratais nó an dá rud.

Más mian leis an gcoláiste go gcuirfidh tú isteach air tríd an Lár-Oifig Iontrála agus is mian leat go meastar gur mac léinn lánfhásta thú, caithfidh tú d’iarratas leis an Lár-Oifig Iontrála a dhéanamh roimh an 1 Feabhra sa bhliain ina dtosaíonn tú do chúrsa.

Rachaidh tú in iomaíocht le mic léinn lánfhásta eile chun áit a fháil i gcúrsa, mar sin, cinntigh go gcuireann tú a mhéid sonraí agus is féidir leat san áireamh maidir le do chúlra oideachais cúlra, taithí oibre agus suimeanna eile.

Iarratas a dhéanamh ar chláir rochtana pháirtaimseartha agus ollscoile

Déan teagmháil le do rogha ollscoile nó do Bhord Oideachais agus Oiliúna áitiúil chun teacht ar eolas faoi chlár rochtana ollscoile agus cúrsaí páirtaimseartha.

Is féidir leat teacht ar eolas mionsonraithe faoi riachtanais agus tacaíochtaí coláiste do mhic léinn lánfhásta in Eolaire Mhic Léinn Lánfhásta Institiúidí Tríú Leibhéal na hÉireann (pdf).

Cá ndéanfaidh mé iarratas mar mhac léinn lánfhásta?

Má tá iarratas á dhéanamh agat ar chúrsa Iar-Ardteistiméireachta (plc) nó ar chlár rochtana, is féidir leat teagmháil a dhéanamh le do BOO áitiúil.

Is féidir leat iarratas a dhéanamh go díreach le coláistí príobháideacha do chúrsaí lánaimseartha, páirtaimseartha agus iarchéime.

Má tá iarratas á dhéanamh agat do chúrsa ag ollscoil, ollscoil teicneolaíochta nó institiúid teicneolaíochta, ba cheart duit teagmháil a dhéanamh leis an gcoláiste faoina riachtanais iarratais.

Iarrann go leor coláistí ort freisin iarratas a dhéanamh tríd an Lár-Oifig Iontrála.

An Lár-Oifig Iontrála

Teach an Túir
Sráid Eglinton
Gaillimh
Éire

Uaireanta Oscailte: Lu-hAo 9:30-17:00
Teil: (091) 509 800
Facs: (091) 562 344
Láithreán Gréasáin: http://www.cao.ie
Dáta an Leasaithe Deireanaigh: 30 Márta 2022