Cláir oideachais agus oiliúna na hEorpa

Eolas

Tá ballstáit aonair an Aontais Eorpaigh (AE) freagrach as a gcórais oideachais agus oiliúna féin agus déanann siad siúd cinneadh faoina bhfuil sna córais sin. D'fhéadfadh an tAontas Eorpach maoiniú agus tacaíocht a chuir ar fáil chun cur le gníomhartha na mballstát. Is é an clár AE a thugann an tacaíocht seo faoi láthair ná an Clár Foghlama Fadsaoil. Bhunaigh Cinneadh Uimh. 1720/2006/CE an 15ú Samhain 2006 an clár.

An Clár Foghlama Fadsaoil

Clúdaíonn an Clár Foghlama Fadsaoil an tréimhse idir 2007-2013, agus tagann sé i gcomharbacht ar na hiar-chláir Socrates, Leonardo da Vinci agus na cláir Ríomhfhoglama. Tacaíonn sé le tionscnaimh agus gníomhaíochtaí a mhúsclaíonn comh-oibriú, soghluaisteacht agus cómhalartú idir na córais traenála agus oiliúna laistigh den AE. Tá 4 phríomh pháirt sa gclár:

• Déileálann Clár Comenius le riachtanais teagaisc agus foghlama na ndaoine go léir atá in oideachas réamhscoile agus scoile suas go dtí deireadh an oideachais dara leibhéil, agus na hinstitiúidí agus eagraíochtaí a sholáthraíonn an t-oideachas sin
• Déileálann Clár Erasmus le riachtanais teagaisc agus foghlamtha na ndaoine go léir atá in ardoideachas foirmiúil, socrúcháin mhic léinn trasnáisiúnta i bhfiontair ina measc, agus na hinstitiúidí agus na heagraíochtaí a chuireann an cineál sin oiliúna agus oideachais ar fáil
• Déileálann Clár Leonardo da Vinci le riachtanais teagaisc agus foghlama na ndaoine atá i ngairmoideachas agus i ngairmoiliúint, ach amháin iad siúd sa tríú leibhéal lena n-áirítear socrúcháin i bhfiontair do dhaoine seachas mic léinn, chomh maith le hinstitiúidí agus eagraíochtaí a chuireann an cineál sin oideachais agus oiliúna ar fáil
• Déileálann Clár Grundtvig le riachtanais foghlama agus teagaisc na ndaoine atá ag baint leasa as aon chineál oideachais do dhaoine fásta, chomh maith leis na hinstitiúidí agus na heagraíochtaí a chuireann an cineál sin oideachais ar fáil.

Tá clár traslíne ann chomh maith a dhéileálann leis na gníomhaíochtaí seo a leanas:

• Comhoibriú polasaí agus nuálaíocht maidir le foghlaim fadsaoil
• Cur chun cinn foghlaim teanga
• Ábhar nuálaíoch TFC-bhunaithe a fhorbairt, chomh maith le seirbhísí, oideolaíochtaí agus cleachtadh d'fhoghlaim fadsaoil
• Scaipeadh agus saothrú torthaí na ngníomhaíochtaí arna dtacú faoin gClár Foghlama Fadsaoil agus faoi chláir den chineál céanna roimhe sin, agus malartú dea-chleachtais

Tá a thuilleadh faisnéise faoin gclár traslíne i Tuilleadh faoin ábhar seo.

Tá Clár Jean Monnet a thacaíonn le hinstitiúidí agus gníomhaíochtaí i réimse an chomhtháthaithe Eorpaigh mar chuid den chlár nua chomh maith.

Tíortha atá páirteach

Tá An Clár Foghlama Fadsaoil ar fáil faoi láthair do:

• An 27 mballstát den AE
• An Tuirc
• An 3 bhallstát eile den EEA (an Íoslainn, an Iorua agus Lichtinstéin)

Beidh an clár ar fáil do thíortha eile atá ina n-iarrthóirí (an Chróit) agus do thíortha Iartharacha na mBalcán nuair a shínítear conarthaí áirithe leo. Tá cainteanna á thionól leis an Eilvéis faoina rannpháirtíocht sa chlár. Tá roinnt gnéithe de Chlár Jean Monnet ar fáil ar fud an domhain.

Comhoibriú le tíortha eile

Tá cláir comhoibrithe oideachais ag an AE freisin le Stáit Aontaithe Mheiriceá, Ceanada, an tSeapáin, an Astráil agus an Nua-Shéalainn.

Gníomhaireachtaí náisiúnta

Tá na cláir oideachais agus oiliúna Eorpacha á chomhbhainistiú go ginearálta ag na gníomhaireachtaí náisiúnta sna tíortha rannpháirtíochta agus ag an gCoimisiún Eorpach féin. In Éirinn, is iad na gníomhaireachtaí náisiúnta atá páirteach ná an tÚdarás um Ard-Oideachas, Léargas, FÁS agus an Rannóg Idirnáisiúnta den Roinn Oideachais agus Scileanna. Is é ról na ngníomhaireachtaí náisiúnta ná:

• Poibliú a dhéanamh ar chláir an Aontais Eorpaigh agus comhairle agus faisnéis a chur ar fáil.
• Cúnamh a thabhairt le páirtithe tionscadail a aimsiú i dtíortha eile an AE
• Comhairle agus treoir a chur ar fáil, mar shampla, faoi iarratais a chur isteach
• Aiseolas a thabhairt ar an gcaoi a bhfuil an clár ag obair

Tá gníomhaireachtaí náisiúnta páirteach go díreach i mbainistiú roinnt fo-thionscnaimh faoi na cláir mhóra oideachais agus gairmoiliúna. Is iad a bhfreagrachtaí maidir leis na tionscadail seo ná:

• Na tionscadail a roghnú
• Deontais a eisiúint
• Monatóireacht a dhéanamh ar dhualgais
• Dualgais bainistíochta airgeadais.

Rátaí

Tá éagsúlacht mhór idir an maoiniú agus na deontais a fhaigheann tionscadail agus cláir malartaithe oideachais Eorpacha agus ba chóir teagmháil a dhéanamh leis na gníomhaireachtaí atá freagrach astu chun a thuilleadh sonraí a fháil.

Conas iarratas a dhéanamh

Is é do chéad phointe teagmhála do cheisteanna ginearálta faoin gClár Foghlama Fadsaoil ná na gníomhaireachtaí náisiúnta atá páirteach ann (An tÚdarás um Ard-Oideachas, Léargas agus FÁS). Fiú nuair a bhíonn ort d'iarratas a chur díreach chuig an gCoimisiún Eorpach, bheadh sé úsáideach labhairt faoi d'iarratas leis an ngníomhaireacht náisiúnta ábhartha ar dtús. D'fhéadfadh sé seo difríocht shuntasach a dhéanamh do chaighdeán d'iarratais.