Coistí Cróinéara

Eolas

Is éard is coiste cróinéara in Éirinn ná fiosrúchán oifigiúil, ar a bhfuil ceannas ag an Chróinéir (agus bíonn giúiré i gcásanna áirithe) faoi bhás tobann, faoi bhás nach bhfuil aon mhíniú air nó faoi bhás lenár bhain foiréigean. Muna féidir bás a mhíniú, is féidir coiste cróinéara a ghairm chun an tsiocair bháis a aimsiú, ar nós an áit agus an chaoi inár tharla an bás.

Ní bheidh an coiste cróinéara ann go dtí sé seachtaine ar a laghad théis an bháis. D'fhéadfadh go mbeadh ar fhinnéithe freastal ar an choiste cróinéara chun fianaise faoi mhionn a thabhairt i leith imthoisceanna agus cúis an bháis. Nuair a bhíonn giúiré ag coiste cróinéara, is é an giúiré seachas an Cróinéir a thugann an bhreith. Is seirbhís éigeantach í seirbhís ghiúiré ag coiste cróinéara agus ní ghlactar ach le breith thromlaigh chun breith a fháil. Ní fhaightear éinne ciontach nó neamhchiontach ag coiste cróinéara agus ní shocraítear aon dliteanas coiriúil nó sibhialta. Ní bhíonn aon "pháirtithe" i gceist agus caomhnaíonn an Cróinéir na teistíochtaí, tuairiscí an scrúdaithe iarbháis agus taifid breitheanna agus cuirtear iad ar fáil don phobal.

Tionóltar coiste cróinéara i dteach cúirte go hiondúil, ach d’fhéadfaí óstáin nó hallaí áitiúla a úsáid freisin.

Nuair a chríochnaíonn na himeachtaí, tugtar breith ó thaobh céannachta an té a bhásaigh, agus conas, cathain agus cén áit ar tharla an bás. Tá bás de bharr tionóisce, míthapa, féinmharú, breith oscailte, cásanna nádúrtha agus marú neamhdhleathach i measc an réimse breitheanna a d'fhéadfadh an Cróinéir nó giúiré (i gcásanna ina mbíonn giúiré, is é an giúiré a thugann an bhreith) a thabhairt.

D'fhéadfadh an cróinéir nó an giúiré moladh ginearálta a dhéanamh chun iarracht básanna den chineál céanna a sheachaint ina dhiaidh sin. Nuair a chríochnaítear an coiste cróinéara, éisíonn an Cróinéir teastas sa chaoi agus gur féidir an bás a chlárú i gceart.