Seirbhísí gutháin ag ardráta a rialú

Rialacha

Sonraí pearsanta

Ní mór do sholáthraithe cloí go hiomlán leis an Acht um Chosaint Sonraí, 1988, (agus le haon leasú air nó reachtaíocht a thagann ina áit) maidir le sonraí pearsanta a bhailiú, a phróiseáil, a choinneáil, a úsáid agus fáil réidh ansin leo.

Ní mór do sheirbhísí a bhailíonn sonraí pearsanta, ainmneacha agus uimhreacha gutháin mar shampla (córais aitheantais/taispeántais na n-uimhreacha a ghlaonn ar an tseirbhís san áireamh) a chur in iúl go soiléar duit cén fáth go dteastaíonn an t-eolas seo uathu. Má tá sonraí pearsanta coinnithe fút agus in úsáid le rudaí eile, ní mór é sin a chur in iúl duit agus deis a thabhairt duit stop a chur leis más mian leat.

Fógraíocht a dhéanamh ar sheirbhísí gutháin ardráta

Ní mór d'aon fhógraíocht maidir le seirbhísí gutháin ardráta in Éirinn sna meáin chumarsáide priontáilte, ar an raidió agus ar an idirlíon cloí le caighdeáin fíor-ghéara le tomhaltóirí a chosaint. Mar shampla, ní féidir bolscaireacht a dhéanamh ar aon tseirbhís ardráta mar sheirbhís atá "in aisce". Ní féidir a rá go bhfuil seirbhís ar fáil "in aisce" muna bhfuil teacht uirthi ach tríd seirbhís ghutháin ardráta. Ní cheadaítear seirbhísí beo comhrá duine le duine, i.e., seirbhísí coinne nó comhrá, a chur ar fáil in Éirinn.

Fógraíocht a dhéanamh ar sheirbhísí gutháin ardráta ar an teilifís

Má bhíonn fógraíocht déanta ar sheirbhísí gutháin ardráta ar an teilifís ní mór go mbeadh praghas na seirbhíse luaite sa chaint. Ní mór freisin go mbeadh eolas faoin bpraghas le feiceáil ar an bhfógra. Caithfear costais na nglaochanna don tréimhse ina mbeidh duine ag baint úsáide as an uimhir ardráta a bheith le feiceáil i bhfoirm téasc (caithfidh an téasc sin a bheith de mhéid faoi leith) le linn an fhógra.

Muna mbíonn san fhógra teilifíse ach 10 soicind ní gá cloí leis na rialacha sin ar fad. Tharla go bhfuil na fógraí sin ró-ghairid le costais na nglaochanna a lua sa chaint ní mór na costais a thabhairt don thomhaltóir ar dtús nuair a ghlaonn sé/sí ar an tseirbhís.

Fógraíocht a dhéanamh ar sheirbhísí gutháin ardráta sna meáin chumarsáide priontáilte

Ní mór eolas maidir le praghasanna a bheith le feiceáil i bhfoirm uimhreacha (CBL san áireamh). Ní mór go mbeadh an téasc de mhéid faoi leith agus éasca le léamh (i.e., ní ceart go mbeadh scrúdú géar ag teastáil len é a léamh).

Fógraíocht a dhéanamh ar sheirbhísí gutháin ardráta ar an raidió

Má bhíonn seirbhísí ardráta fograithe ar an raidió ní mór go mbeadh costas an ghlaoch agus eolas maidir leis an Soláthraí Seirbhíse curtha ar fáil don tomhaltóir.

Fógraíocht a dhéanamh ar sheirbhísí gutháin ardráta ar an idirlíon

Ní mór a lua i mbolscaireacht a dhéantar ar an idirlíon maidir le seirbhísí gutháin ardráta nach féidir le costas na nglaochanna dul thar 25 euro agus caithfear eolas maidir leis na praghasanna a bheith le feiceáil ar an scáileán. Chomh maith leis sin, ní mór go mbeadh córas slandála i bhfeidhm le cinntiú go bhfuil cead faighte ón té a íocann na billí sula ndéantar aon ghlaoch.

Seirbhísí Beo

Seirbhísí ardráta ina mbíonn comhrá/cumarsáid idir bheirt iad seirbhísí beo. Ní cheadaítear do na seirbhísí seo feidhmiú in Éirinn. Ní mór do sholáthraithe seirbhíse a sholáthraíonn seirbhísí ó thaobh amuigh d'Éirinn costas an ghlaoch a thabhairt i bhfoirm chainte agus ainm soláthraí na seirbhíse ag tús gach seirbhís bheo chomh maith le rabhadh a thabhairt do chustaiméirí nuair atá euro 30 caite. Iarrfar ansin ort an mian leat leanacht leis an nglaoch. Faoi rialacha ComReg ní mór cuid de na seirbhísí beo a thaifead ar mhaithe le monatóireacht a dhéanamh agus má tá sé i gceist ní mór a chur in iúl duit go bhfuil do ghlaoch dhá thaifeadadh. Tá rialacha géara i bhfeidhm maidir leis an gcineál comhrá nach féidir a thaifead.

Seirbhísí Tarot

Ní féidir aon tagairt a dhéanamh in ábhar bolscaireachta nó i seirbhísí tarot féin do na focail "faigh amach faoin todhchaí" nó "réamhinsím an todhchaí". Ní féidir bolscaireacht a dhéanamh ar sheirbhísí tarot le maoímh atá bunaithe ar thuairim nach féidir a chruthú le heolaíocht nó ní féidir a leithéid de mhaoímh a bheith mar chuid den tseirbhís féin.

Seirbhísí ar thaifead

Baineann na rialacha éagsúla atá leagtha síos sa Chód Cleachtais agus atá ábharach don tseirbhís faoi leith atá dhá sholáthar le seirbhísí ar thaifead.

Seirbhísí comhrá samhalta agus seirbhísí teagmhála agus coinne

Ní bhíonn comhrá beo teileafóin i gceist le seirbhísí comhrá samhalta ach bíonn beirt tomhaltóir nó níos mó in ann teachtaireachtaí faoi leith a thaifead agus a chur chuig a chéile agus iad ceangailte leis an tseirbhís. D'fhéadfadh sé freisin go mbeadh sonraí teagmhála dhá chur ag na tomhaltóirí chuig a chéile agus iad ag cur na dteachtaireachtaí.

Tugann na seribhísí teagmhála agus coinne deis do dhaoine nach raibh aithne acu ar a chéile cheana an chéad teagmháil a dhéanamh agus coinne a dhéanamh castáil lena chéile. Ní bhíonn tomhaltóirí in ann teachtaireachtaí faoi leith a thaifead agus a chur chuig a chéile agus iad ceangailte leis an tseirbhís.

Níl sé de chead ag daoine atá faoi aois agus ag páistí úsáid a bhaint as seirbhísí comhrá samhalta agus seirbhísí teagmhála agus coinne agus tá iachall ar sholáthraithe seirbhíse cinntiú nach dtarlaíonn sé seo. Nuair atá bolscaireacht dhá dhéanamh ar na seirbhísí seo ní féidir an focal "beo" a lua chomh maith le focail faoi leith eile. Ní cheart go mbeadh aon téasc ná léaráidí san ábhar bolscaireacht atá gnéasúil nó le míniú den chinéal sin.

Ní mór go mbeadh rabhadh tugtha le seirbhísí comhrá samhalta ag tús an ghlaoch go mbainfear amach ábhar atá gáirsiúil nó a bhfuil míniú gnéasúil ag baint leis. Ní cheadaítear "Rochtain tostach" (i.e., rochtain gan caint) chuig na seirbhísí seo.

Má bhíonn tú ag glaoch ar sheirbhís chomhrá samhalta agus nuair a bhíonn euro 20 caite, ní mór é sin a chur in iúl duit agus do chead a fháil coinneáil leis an nglaoch.

Ní mór do sholáthraithe seirbhíse cinntiú go bhfuil comhairle curtha ar thomalthóirí maidir lena bheith ar a n-airdeall nuair a chasann siad le daoine eile tríd seirbhísí comhrá samhalta agus seirbhísí teagmhála agus coinne. Ní cheadaítear téasc leis na focail "teagmháil ar an bpointe" ná "beo ar an líne" nuair atá seirbhísí comhrá samhalta dhá fhógairt.

Gearáin

Má bhíonn gearán agat ná imní ort is fearr é a chur i scríbhinn. Ní mór gearáin a dhéanamh taobh istigh de thrí mhí ón am a úsáideann tú an tseirbhís, ach, tá discréid ag an Rialóir deileáil le gearáin nach gcloíann leis an riail sin. Tá sé tábhachtach freisin a rá go mbreathnaítear ar gach gearán faoi rún.

Tabhair faoi deara nach féidir le ComReg deileáil le conspóidí a bhaineann le costas na nglaochanna chuig seirbhís ardráta. Beidh ort teagmháil a dhéanamh go díreach leis an soláthraí seirbhíse le do ghearán a dhéanamh.