Líonraí Teileafóin Phóca in Éirinn

Rialacha

Cuimhnigh go bhfuil cosaint maidir leis an ngléas fóin phóca a cheannaíonn tú faoin Acht um Dhíol Earraí agus Soláthar Seirbhísí, 1980. Ciallaíonn sin gur chóir go mbeadh aon ghléas teileafóin phóca a cheannófá

• De réir an chur síos a thugtar air – ar an ábhar margaíochta nó ón lucht díolacháin
• Infheidhme (.i. oiriúnach chun a úsáide mar ghléas teileafóin phóca)
• Ar chaighdeán indíolta (.i. acmhainn a dhíolta agus a úsáide ag an gcustaiméir a bheith ann)

Sa chás go n-éiríonn gléas fóin nó píosa eile den trealamh fón póca a cheannaíonn tú ó sholáthraí seirbhíse teileafóin phóca fabhtach is féidir leat é a thabhairt ar ais agus gléas eile a fháil ina ionad go gcuirtear caoi air nó aisíoc. Ní shonraítear sa reachtaíocht an cineál cúitimh is gá don mhiondíoltóir a thabhairt duit ach ba cheart a bheith ag súil go mbeadh sé réasúnta. Tá cur síos ar an gcaoi le gearán a dhéanamh anseo. Sa chás go bhfuil na deismireachtaí gearáin ar fad triáilte agat gan sásamh a fháil, is féidir leat an t-éileamh a dhéanamh le Cúirt na nÉileamh Beag.

Seirbhísí 3G

Is téarma maidir le ‘Teicneolaíocht Theileafón Póca den Tríú Glún’ atá sa téarma 3G. Fágann córais teileafóin phóca den tríú glún gur féidir tarchuradóireacht ardluais a dhéanamh ar shonraí agus úsáid a bhaint as feidhmchláir ilmheáin níos cuimsithí ar nós fís lánghluaiseachta, comhdhálacha físe agus an tIdirlíon.

Árachas Teileafóin Phóca

Le hárachas teileafóin phóca, ar nós árachas de chineálacha eile, glactar árachas ar an sás láimhe in aghaidh chaillteanas, ghadaíocht, agus mar sin de. Tairgítear le go leor polasaithe árachais theileafóin phóca cosaint a thabhairt do do theileafón póca in aghaidh dhamáiste de thimpiste, ó ghadaíocht, caillteanas, damáiste ó uisce, agus eile. Is minic agus teileafón póca á cheannach go bhfiafrófaí díot an raibh tú ag iarraidh árachas teileafóin phóca. Seiceáil an tsuim a bheadh le híoc agat féin ar dtús sula n-íocfadh an comhlacht árachais thusa maidir le haon chaillteanas nó damáiste d’earra faoi árachas. An farasbarr a thugtar ar an tsuim sin a chaitheann tú féin a íoc ar dtús. Má tá árachas agat ar an teach agus a bhfuil ann, d’fhéadfadh go dtiocfadh goid an teileafóin phóca faoin árachas sin – is féidir é a sheiceáil leis an gcomhlacht árachais. D’fhéadfadh go dtiocfadh nithe eile faoi árachas faoi leith ar theileafón póca ar nós glaonna a dhéanfadh daoine gan scrupall.

Seirbhís Sruthaireachta (‘Roaming’)

Nuair a cheannaítear teileafón póca a íoctar trí bhille in Éirinn, sínítear conradh i leith seirbhíse a ligean do dhuine réimse seirbhísí a úsáid ar nós glaonna teileafóin, teachtaireachtaí téacs agus pictiúir etc. Ba cheart do gach tomhaltóir a bheith ar an eolas go hiomlán maidir le téarmaí agus coinníollacha an chonartha atá acu. Má cheadaíonn an soláthraí seirbhíse duit an fón póca a úsáid agus tú ag taisteal thar lear, d’fhéadfadh go ngearrfaí ‘táillí sruthaireachta’ ort. Tugtar ‘sruthaireacht’ (roaming) ar úsáid an fhón póca nuair a théitear thar tír amach. Ba cheart duit bheith ar an airdeall maidir lena éagsúil is atá na táillí maidir leis an fón a úsáid agus tú ag sruthaireacht agus na táillí a ghearrtar maidir le glaonna ag baile.

Is inmholta an beart seiceáil leis an soláthraí seirbhíse sula dtéitear thar lear go bhfeicfidh tú cé na táillí a ghearrfar má úsáideann tú an fón i dtír iasachta. Tá bileog curtha ar fáil ag ComReg ina gcuirtear comhairle maidir le ‘sruthaireacht’ le teileafón póca agus tá sin ar fáil ar www.askcomreg.ie.

Sa chás go ngoidtear an fón ort

Tá uimhir dó féin ag gach sás láimhe a dhíoltar ar a dtugtar IMEI (Aitheantóir Idirnáisiúnta Fóin Póca). Coinnigh tuairisc ar an eolas sin agus cláraigh leis an soláthraí seirbhíse teileafóin phóca atá agat é nuair a cheannaíonn tú an sás láimhe. Sa chás go ngoidtear an fón ort, tabhair tuairisc maidir leis an ngoid do na Gardaí agus don soláthraí seirbhíse theileafón póca gan mhoill agus féadfar cinntiú nach n-oibreoidh an fón ar líonra ar bith. Déan teagmháil leis an soláthraí seirbhíse theileafón póca maidir le tuilleadh eolais faoin scéim seo.

Leanaí agus Fóin Phóca

Úsáideann go leor leanaí in Éirinn agus thar lear fóin phóca. Is féidir an t-idirlíon a cheadú trí mheán fóin phóca nua-aimseartha chomh maith le hábhar físe nó íomhánna a sheoladh a d’fhéadfadh a bheith oiriúnach nó mí-oiriúnach do leanaí. Tá treoir dar teideal A parent’s guide to mobile phones (pdf) foilsithe ag The Irish Cellular Industry Association ina mínítear an dea-chleachtas maidir le húsáid fóin phóca ag leanaí. Tá suíomh idirlín www.hotline.ie bunaithe ag The Internet Service Providers Association of Ireland i gcomhar leis an mBord Comhairleach Idirlínar ar féidir tuairisc a thabhairt ar chásanna ina dtagtar trasna ar phornagrafaíocht leanaí.