Rialacha

Ón mbliain 1990 i leith, tá reachtaíocht in Éirinn a chuireann cosc ar bhréagáin a chur ar an margadh mura mbaineann siad na bunriachtanais sábháilteachta amach. Tá an dlí seo leagtha síos in I.R. Uimh. 32 de 1990, Rialúcháin na gComhphobal Eorpach (Sábháilteacht Bréagán).

Lena chois sin, maíonn rialacha an Aontais Eorpaigh go gcaithfidh gach táirge a thairgtear ar díol san Aontas Eorpach agus a chomhlíonann caighdeáin chosanta áirithe sláinte, sábháilteachta agus timpeallachta, marc CE a iompar. Is lipéad le dronuilleog bhán é an marc CE ar tháirge ar a bhfuil na litreacha CE i litreacha dubha. Is dearbhú é ón táirgeoir an marc CE go leanann an táirge reachtaíocht uilig an Aontais Eorpaigh a bhaineann leis. Breathnaigh ar an marc CE anseo.

Is féidir marc caighdeáin teicniúil na hÉireann IS EN71 a chur ar an mbréagán i dteannta an mhairc CE. Sonraíonn sé seo go leanann an bréagán na rialacháin sábháilteachta go léir.

Déan cinnte i gcónaí go bhfuil an marc CE ar bhréagán nó ar tháirge a cheannaíonn tú.

Céard é bréagán?

I gcúrsaí dlí, sainmhínítear bréagán mar tháirge atá dírithe ar leanaí faoi 14 bliain d’aois chun súgradh leis.

Ní chlúdaítear áilleagáin (.i. trealamh spóirt, dairteanna miotail, mion-ghalinnill, seodra faisin srl.) faoin reachtaíocht chéanna. Ba cheart go ndéanfadh gasúir atá aosta go leor agus a thuigeann na contúirtí a bhaineann leo spraoi leis na míreanna seo agus iad siúd amháin.

Ba cheart go ndéanfaidh daoine fásta feitheoireacht ar leanaí agus iad ag baint úsáide as áilleagáin más féidir. Is féidir leat liosta cuimsitheach d’áilleagáin agus tuilleadh eolais ar shábháilteacht bréagáin a aimsiú anseo.

Treoirlínte Ginearálta chun táirgí sábháilte a cheannach do leanaí

Seo a leanas roinnt treoirlínte ginearálta agus tú ag ceannach táirgí sábháilte agus bréagáin. Ba cheart do mhíreanna a bheith:

• láidir agus buanfasach (i.e., níor cheart go mbrisfeadh siad go héasca)
• déanta d’ábhar nach ndófadh ró-éasca
• déanta d’ábhair mhí-thocsaineacha
• ag iompar mairc CE

Ba cheart go gcuirfí in iúl nach bhfuil bréagán feiliúnach do leanaí faoi 36 mí má tá píosaí inscortha istigh leis. Ba cheart go dtugtar le fios duit má tá aon chontúirt faoi leith ag baint leis. Mar shampla, is féidir méara leanaí a sháinniú i bpíosa a bhíonn ag bogadh i dtáirge (san áireamh leis seo tá bréagáin a fhilleann nó insí/ claspaí ar chliabháin srl.). Ba cheart go mbeadh coscáin sásúla ag rothair agus ag cairtíní srl. chomh maith le sciath do shlabhraí agus píosaí eile a bhíonn ag bogadh. Má bhíonn rothair á n-úsáid ar bhóithre poiblí, ba cheart go mbeadh soilse sásúla acu. Léigh tuilleadh faoi shoilse ar rothair anseo. Léigh tuilleadh faoi leanaí agus sábháilteacht rothair anseo.

Úsáid shábháilte de tháirgí leanaí

Is ciallmhar an rud é a dhéanamh cinnte go n-úsáidtear bréagáin go sábháilte. Sonraíonn bréagáin leis an marc CE go bhfuil siad sábháilte le húsáid mar ba cheart. Is é sin, don aoisghrúpa a fheileann don bhréagán.

Mar shampla, is féidir le bréagán a fheileann do ghasúir atá deich mbliana d’aois a bheith contúirteach do ghasúr atá trí bliana déag d’aois.

Bréagáin Leictreacha

Ba cheart go n-iompródh bréagáin leictreacha an marc CE le cinntiú go leantar caighdeáin sábháilteachta an Aontais Eorpaigh. Níor cheart go ndíolfaí aon bhréagán leictreach le níos mó ná 24 volta. (Ní hé seo an scéal iomlán. Níl ann do mhíreanna leictreacha atá dírithe ar leanaí, go háirithe lampaí ach is cinnte NACH bréagáin iad seo agus ba cheart go n-iompródh siad lipéad le foclaíocht dá réir sin.) Ba cheart go mbeadh gach cuid den bhréagán inslithe i gceart chun teagmháil le sreanga beo a sheachaint. Ní mór do threoracha sábháilteachta ar bhréagáin leictreacha a bheith soiléir agus beacht agus ba cheart go gcloífeadh tomhaltóirí leo.

Bréagáin agus lipéadú táirgí leanaí

Ba cheart go bhfeicfeá an t-eolas seo a leanas ar an bpacáistiú nó ar an táirge é féin

• An marc CE
• Ainm, Trádmharc agus Seoladh an déantúsóra, a ghníomhaire nó a allmhaireoir laistigh den Aontas Eorpach
• Treoracha chun é a úsáid, más ann dóibh
• Comhairle ar úsáid shábháilte an bhréagáin (cuir i gcás, ‘mí-oiriúnach do leanaí faoi 36 mí’)

Is féidir marc caighdeáin teicniúil na hÉireann a chur ar an mbréagán i dteannta an mhairc CE. Sonraíonn sé seo go leanann an bréagán na rialacháin sábháilteachta go léir. Is é an Caighdeán do Bhréagáin is coitianta ná IS EN 71.