Cearta Tomhaltóirí agus siopadóireacht treasteorann in Aontas na hEorpa

Rialacha

Nithe soghluaiste iad earraí tomhaltóra, gan leictreachas, uisce ná gás a bheith san áireamh, nuair nach bhfuileadar le díol i méid teoranta. Mar shampla ní earraí tomhaltóra iad uisce ó sconna nó gás atá dhá sholáthar chuig do theach ach is earraí tomhaltóra iad buidéal uisce nó ceaineastar gáis.

Ní mór go mbeadh ráitis i dtaobh earraí tomhaltóra fíor nó is é/í an miondíoltóir atá freagrach. San áireamh tá cur síos déanta i mbolscaireacht, margaíocht, lipéidí nó ráitis déanta ag an miondíoltóir. Má thaispeáintear earra samplach duit, ní mór go mbeadh an t-earra a cheannaíonn tú den chaighdeán céanna. Ní mór go mbeadh an táirge in ann don ghnó lenar ceannaíodh é (mar shampla má cheannaíonn tú stánosclóir ní mór go mbeadh sé in ann cannaí a oscailt).

Más cuid den phraghas ceannaithe é an t-earra a shuiteáil tá an miondíoltóir freagrach ansin as aon bhotún a dhéantar maidir leis an suiteáil. Más tú féin a dhéanann an t-earra a shuiteáil agus má bhíonn aon bhotún sna treoracha tugtha is é/í an miondíoltóir atá freagrach. Mar shampla, má cheannaigh tú leaba gur gá duit a chur le chéile thú féin agus má tá na treoracha scríofa i Sínis, ní mór don mhiondíoltóir treoracha a chur ar fáil i mBéarla ach amháin gur chuir sé/sí é seo in iúl duit nuair a cheannaigh tú an leaba agus gur ofráil sé an leaba duit ar phraghas laghdaithe.

Má bhíonn na hearraí lochtach sa chéad sé mhí, deirtear go raibh siad lochtach ag am an cheannaithe. Beidh lánchearta agat i gcónaí ar feadh bliana go leith eile ach faoi sin beidh ort a chruthú don mhiondíoltóir go bhfuil an táirge lochtach. Baineann seo amháin leis an gcineál earra nár cheart dó a bheith lochtach taobh istigh de thréimhse dhá bhliain, mar shampla, ní ceart duit gearán a dhéanamh maidir le peann aon uaire má ritheann an dúch amach tar éis ceithre mhí ach amháin go raibh sé ráite go soiléir go mairfeadh sé ar feadh tréimhse níos faide ná ceithre mhí.

Is féidir leat banna a iarraidh, agus ba cheart a bheith san áireamh tréimhse an bhanna, a limistéar teorann agus ainm agus seoladh an urra. Ba cheart go mbeadh sé ar fáil i dteangacha oifigiúla an AE. Ní féidir leis an mbanna dul faoi na cearta atá agat faoin dTreoir nó i reachtaíocht náisiúnta.