Aisíocaíochtaí, Nótaí Sochair agus Dearbháin

Eolas

Má ghlactar le gearán a dhéanann tú tar éis earraí neamhfheidhmeacha nó lochtacha a cheannach, tá tú i dteideal earra nua, deisiú nó aisíoc a fháil. Más aisíoc atá i gceist, is fiú cuimhneamh nach míníonn An tAcht Um Dhíol Earraí Agus Soláthar Seirbhísí, 1980 an chaoi chun aisíoc a dhéanamh. Féadfaidh an miondíoltóir nó soláthraí seirbhísí aisíoc a chur i gcrích trí airgead tirim nó seic a thabhairt don tomhaltóir nó tríd an méid cuí a lóisteáil ina chárta creidmheasa. D’fhéadfaí nóta sochair a eisiúint freisin. Mínítear na difríochtaí idir na modhanna seo thíos.

• Ciallaíonn aisíoc go dtugann an miondíoltóir do chuid airgid ar ais duit mar mhalairt ar na hearraí lochtacha. Má d’íoc tú le cárta dochair nó creidmheasa féadfaidh an díoltóir tú a aisíoc tríd an gcárta seachas le hairgead tirim. Má glacadh le gearán tomhaltóra uait, níl sé de cheart ag an miondíoltóir tabhairt ort glacadh le nóta sochair seachas aisíocaíocht.
• Is nóta páipéir é nóta sochair a thugann an díoltóir don chustaiméir nuair a thugtar earraí ar ais. Tá an nóta sochair cosúil le dearbhán nach féidir a úsáid ach sa siopa nó sa slabhra siopaí ónar eisíodh é. Má thugann tú earraí lochtacha ar ais ní gá glacadh le nóta sochair. Tig leat deisiúchán, earra nua nó aisíoc a éileamh de réir cineál na n-earraí agus cúinsí eile. Má ghlacann tú le nóta sochair seans nach mbeidh tú in ann aisíoc a éileamh níos déanaí.
• Is éard is dearbhán ann ná nóta páipéir nó cárta. Go hiondúil ní féidir an dearbhán a úsáid ach le soláthraí seirbhísí nó díoltóir ar leith. Nuair a cheannaíonn tú dearbhán, cinntigh go bhfuil na téarmaí soiléir (mar shampla, achar bailíochta an dearbháin, srl.). Níl ceart ar bith agat má chailltear an dearbhán.

Cuimhnigh, má thagann tú ar athrú intinne faoi earra a cheannaigh tú níl tú i dteideal é a thabhairt ar ais nó aisíoc a fháil. D’fhéadfaí go dtabharfadh díoltóir nóta sochair duit ar chomhluach an earra ach ní gá dó.