Comhaontuithe idirscartha in Éirinn

Eolas

Más féidir le lánúin pósta in Éirinn aontú ar na téarmaí ar a mairfidh siad uathu féin, is féidir leo glacadh le Comhaontú Idirscartha. Is é an rud bunúsach a bhaineann le Comhaontú Idirscartha ná gur comhaontú atá ann. Ní mór don bheirt pháirtithe toiliú le téarmaí an chomhaontaithe. Seo mar a leanas na príomh-shaincheisteanna a láimhseáiltear i gComhaontú Idirscartha:

• Comhaontú ar mhaireachtáil óna chéile
• Socruithe comhaontaithe maidir le caomhnóireacht agus rochtain ar leanaí
• Aitiú agus úinéireacht theach an teaghlaigh agus aon mhaoine eile
• Cothabháil agus aon íocaíochtaí cnapshuime
• Slánaíocht ó fhiacha an chéile eile
• Cánachas
• Cearta Oidhreachta.

Is conradh ag a bhfuil ceangal dlí atá sa chomhaontú, a leagann síos cearta agus oibleagáidí gach páirtí dá chéile. Is iondúil go dtagtar ar théarmaí an chomhaontaithe trí idirghabháil nó idirbheartaíocht idir aturnaetha.

I gcás idirghabhála, níl ach idirghabhálaí amháin ann a fheiceann an lánúin in éindí. Is é an cuspóir atá le hidirghabháil ná cabhrú le lánúin a rinne cinneadh scaradh aon díospóidí atá eatarthu maidir leis na saincheisteanna lárnacha de chaomhnóireacht agus rochtain ar leanaí, cothabháil agus cearta maoine a réiteach. Má thagtar ar chomhaontú, dréachtóidh an t-idirghabhálaí téarmaí an chomhaontaithe.

Sa chás go ndéantar idirbheartaíocht don chomhaontú idir aturnaetha, ní mór do gach páirtí a n-aturnae féin a bheith acu lena chinntiú go bhfaighidh siad comhairle dlí neamhspleách.

Is éard is cleachtas chomhoibritheach ann ná bealach chun theacht ar réiteach ina n-oibríonn tú féin agus do chéile le dlíodóirí comhoibritheacha. Is féidir leat tuilleadh a fhoghlaim faoi chleachtas comhoibritheach sa chuid Tuilleadh faoin ábhar seo den doiciméad seo.

Is minic go dtugtar “Gníomhas Idirscartha” ar an doiciméad arna tharraingt suas agus arna shíniú ag an mbeirt pháirtithe. Nuair a shínítear an comhaontú, is féidir riail chúirte a dhéanamh de trí iarratas a sheoladh chuig an gcúirt. Cinntíonn sé seo gur féidir na téarmaí go léir a aontaítear maidir leis na leanaí a chur i bhfeidhm go dlíthiúil sa chás go bhfuil siad clúdaithe ag reachtaíocht chuí.

Más féidir teacht ar chomhaontú réasúnta tapa idir na páirtithe agus Comhaontú Idirscartha a dhéanamh amach, bíonn sé níos saoire agus ní bhíonn sé chomh strusmhar le cás cúirte a ghlacadh. Cuireann go leor lánúin a n-idirscaradh ar bhonn foirmiúil ar an mbealach seo.