Athrú Ainm de réir Gníomhais Aonpháirtí.

Eolas

In Éirinn, tugtar 'Gníomhas Aonpháirtí' ar dhearbhú sínithe a dhéanann duine a chuireann oibligeáid áirithe air nó uirthi ó dháta an tsínithe ar aghaidh. I nGníomhas Aonpháirtí le hainm a athrú déantar ráiteas faoi mhionn nó mionnscríbhinn a dhearbhaíonn go bhfuil tú ag éirí as úsáid do sheanainm, go n-úsáidfidh tú d'ainm nua i gcónaí feasta agus go bhfuil tú ag iarraidh ar chuile dhuine d'ainm nua a úsáid.

D'ainm a athrú tar éis pósadh

Níl aon oibligeáid faoin dlí nó ar aon bhealach eile ar éinne in Éirinn ainm a athrú tar éis pósadh. Is fíor go n-athraíonn roinnt daoine a sloinne mar gurb é an nós é. D'fhéadfadh sé, mar shampla, go mbeidís ag cur in iúl go raibh siad tar éis ceangal le teaghlach nua - ach is rogha sóisialta/ cultúrtha é seo gan aon bhunús dlíthiúil.

Tuilleann tú d'ainm trí úsáid agus iomrá. Mar sin má bhíonn duine ag iarraidh go n-aithneofaí é/í ar a s(h)loinne pósta (nó aon ainm eile), úsáideann sé/sí an t-ainm sin agus iarrann sé/sí ar dhaoine eile é a thabhairt air nó uirthi.

Is é Gníomhas Aonpháirtí an t-aon bhealach amháin le hainm a athrú go dlíthiúil.

In Éirinn siad na teidil 'Iníon' nó 'Uas.' nó 'Bn.' a úsáidtear le stádas pósta nó aonta mná a chur in iúl. Níl aon iachall dlíthiúil ort an teideal cuí a úsáid is cuma pósta nó aonta thú. Ós rud é gur trí úsáid agus iomrá a thuilleann daoine a n-ainm, tá cead ag bean pé teideal is mian léi a úsáid lena hainm. Mar sin, tá cead aici an teideal Bn. a úsáid lena sloinne aonta más shin é a roghnaíonn sí.

Sloinne páiste a athrú

Féadfar sloinne an linbh a athrú ar Chlár na mBreitheanna ach ní dhéantar é sin ach in imthosca speisialta. Mar sin féin, féadfar sloinne an linbh a athrú trí ghníomhas aonpháirtí nó trí úsáid choiteann. Féadfaidh leanaí atá idir 14 agus 17 mbliana d’aois Gníomhas Aonpháirtí a fhorghníomhú iad féin, ach bíonn toiliú ón mbeirt thuismitheoirí ag teastáil. Nuair a bhíonn leanbh faoi bhun 14 bliana d’aois, caithfidh tuismitheoir amháin an Gníomhas Aonpháirtí a fhorghníomhú le toiliú an tuismitheora eile.

Gníomhas aonpháirtí a chlárú

Is fiú d'ainm a athrú le Gníomhas Aonpháirtí mar ansin beidh taifead oifigiúil ann le thú a aithint faoi d'ainm nua feasta. Is féidir é a cheangal le do dheimhniú breithe, is féidir é a úsáid i gcúrsaí riaracháin, agus réitíonn sé go héasca agus gan chostas an chuid is mó de na deacrachtaí a d'fhéadfadh tarlú de bharr d'ainm a athrú.

Féadfaidh tú dhul ag aturnae le Gníomhas Aonpháirtí a réiteach duit nó is féidir leat féin é a dhéanamh.

Má athraíonn tú d'ainm go hoifigiúil in Éirinn le Gníomhas Aonpháirtí liostálfar nó clárófar an t-athrú san Ardchúirt.