Riachtanais fógartha don phósadh

Rialacha

Ón 5 Samhain 2007 i leith, ní mór do bheirt atá ag pósadh fógra a thabhairt go pearsanta do Chláraitheoir ar a laghad 3 mhí roimh an dáta a bhfuil sé i gceist acu pósadh. Is féidir an fógra seo a thabhairt do Chláraitheoir ar bith.

Nuair a dhéanann sibh an coinne leis an gCláraitheoir cuirfear ar an eolas sibh maidir leis an bhfaisnéis agus na cáipéisí is gá daoibh a thabhairt libh. Is iondúil go mbeidh ort féin agus an té atá tú chun pósadh na nithe seo a leanas a thabhairt libh:

• Pasanna mar chomhartha aitheantais.
• Teastais breithe
• Foraithne chríochnaitheach colscartha má tá ceachtar agaibh colscartha. Beidh gá le tuilleadh eolais más colscaradh eachtrannach a bhí ann agus beidh aistriúchán Béarla ceadaithe den fhoraithne colscartha ag teastáil uaibh.
• Teastas báis chéile atá básaithe agus teastas pósta sibhialta más baintreach ceachtar den bheirt agaibh.
• Uimhreacha PSP

Caithfidh tú eolas a chur ar fáil faoin bpósadh atá ar intinn agaibh, mar shampla:

• An seirbhís sibhialta nó reiligiúnach a bheidh i gceist
• An dáta agus an t-ionad atá ceaptha don phósadh
• Sonraí an tsollúnóra atá chun sollúnú a dhéanamh ar an bpósadh
• Ainmneacha agus dátaí breithe an bheirt fhinnéithe atá i gceist

Beidh ort táille fógartha de €150 a íoc freisin.

Nuair a théann sibh chuig an gCláraitheoir beidh oraibh dearbhú a thabhairt nach bhfuil aon bhac ar an bpósadh.

Eiseoidh an Cláraitheoir admháil don bheirt agaibh agus don sollúnóir atá beartaithe don phósadh ag dearbhú an dáta a fuarthas an fógra. Ní thugann sé seo cead daoibh pósadh.

Má tá an t-eolas riachtanach ar fad curtha ar fáil agus nach bhfuil aon bhac ar an bpósadh, eiseoidh an Cláraitheoir Foirm Chláraithe Pósta daoibh.

Fógra sa Phost

Má tá ceachtar agaibh ag maireachtáil thar lear, nó mura bhfuil duine agaibh in ann freastal ar Oifig Chláraithe mar gheall ar dhroch-thinneas, ba chóir daoibh teagmháil a dhéanamh le Cláraitheoir chun cead a fháil an fógra 3 mhí a thabhairt sa phost. Má thugtar cead daoibh, seolfaidh an Cláraitheoir foirm chugaibh nach mór daoibh a chomhlánú agus a sheoladh ar ais.

Beidh oraibh fós socruithe a dhéanamh chun bualadh leis an gCláraitheoir ar a laghad 5 lá roimh an bpósadh chun an dearbhú a thabhairt. Teastaíonn sé seo sular féidir Foirm Chláraithe Pósta a eisiúint.

Ordú Díolúine Cúirte

I gcúinsí speisialta ar leith, mar shampla, i gcás tinneas an-tromchúiseach, b'fhéidir go mbeadh ar bhur gcumas Ordú Díolúine Cúirte a fháil a thugann cead don phósadh dul chun cinn gan an fógra trí mhí. Ba chóir daoibh dul i dteagmháil leis an Cúirt Chuarda Teaghlaigh nó leis an Ard-Chúirt sa cheantar ina bhfuil cónaí ar dhuine agaibh chun sonraí a fháil maidir le conas dul ar aghaidh leis seo.

Is nós imeachta neamhfhoirmiúil é seo. Is féidir libh iarratas a sheoladh isteach (gan aturnae a fháil). Níl aon táille cúirte i gceist ar iarratas ar Ordú Díolúine Cúirte. Má fhaigheann tú aturnae chun ionadaíocht a dhéanamh ort, beidh ort é/í a íoc. Ní mór duit na nithe seo a leanas a léiriú don chúirt:

• go bhfuil cúiseanna maithe le d'iarratas
• go bhfuil deonú Ordú Díolúine den sórt seo ar son dea-leasa na bpáirtithe sa phósadh atá beartaithe.

Má thugtar Ordú Díolúine Cúirte duit, beidh oraibh fós socruithe a dhéanamh chun bualadh leis an gCláraitheoir ar a laghad 5 lá sula bpósann sibh chun an dearbhú a dhéanamh. Teastaíonn sé seo sular féidir Foirm Chláraithe Pósta a eisiúint.

Dearbhú nach bhfuil aon bhac i gceist

Nuair a bhuaileann sibh leis an gCláraitheoir beidh oraibh dearbhú a shíniú, os comhair an Chláraitheora, nach fios daoibh aon bhac dlíthiúil a bheith ar an bpósadh atá beartaithe agaibh.

Foirm Chláraithe Pósta

Tá Foirm Chláraithe Pósta (FCP) cosúil le teastas pósta. Tugann sé údarú do bheirt pósadh agus teastaíonn ceann acu uaibh chun pósadh in Éirinn. Chomh fada is nach bhfuil aon bhac ar an bpósadh, eiseoidh an Cláraitheoir FCP daoibh. Má thugann sibh an cháipéisíocht agus an t-eolas riachtanach ar fad libh chuig an gcruinniú leis an gCláraitheoir, b'fhéidir go mbeadh an Cláraitheoir ábalta an FCP a eisiúint láithreach.

Mura dtarlaíonn an pósadh taobh istigh de 6 mhí ón dáta atá ar an FCP, beidh gá le FCP nua má tá sé fós i gceist agaibh pósadh. Beidh oraibh dul tríd an bpróiseas fógartha arís.

Socruithe idirthréimhseacha

Má thug sibh bhur bhfógra 3 mhí roimh an 5 Samhain 2007, ní bheadh Foirm Chláraithe Pósta faighte agaibh. Tá socruithe idirthréimhseacha éagsúla ann ag brath ar an gcineál searmanas pósta a bheidh agaibh. Is féidir leat tuilleadh a fháil amach faoi na socruithe seo inár ndoiciméid ar searmanais phósta sibhialta agus searmanais phósta reiligiúnacha.