Réamhriachtanais don Phósadh
Eolas
Gealltanas tábhachtach atá sa phósadh. Conradh dleathúil atá ann a mbeidh tionchar aige ar an dá pháirtí (agus, go teoranta ar a gclann) ar feadh a saoil agus fiú i ndiaidh a mbáis. Tá roinnt rialacha daingne a bhaineann le pósadh. Baineann an chéad chuid le cé hiad na daoine gur féidir agus nach féidir leo pósadh agus cé na cúinsí a bhaineann leis sin.
Nuair atá na coinníollacha seo sásta agat ba cheart an cinneadh a dhéanamh cén chaoi gur mhaith leat pósadh. Tá roinnt bealaí eagsúla ann le pósadh (searmanas cráifeach agus sibhialta) sa chaoi go mbeidh sé dleathúil.
Baineann an píosa seo leis na rialacha dleathúla amháin a bhaineann le pósadh. Má tá tú le pósadh ag searmanas cráifeach ba cheart na coinníollacha cráifeacha a phlé le céiliúraí an phósta.
Rialacha
Le pósadh dleathúil a chur i gcrích in Éirinn ní mór do na páirtithe:
- a bheith in ann a chéile a phósadh
- pósadh dhá ndeoin féin. D'fhéadfadh sé nach mbeadh an pósadh curtha i gcrích dá d(h)eoin féin má tá duine ar meisce, duine ag fulaingt damáiste intinne, míchumas intinne, neamhshéasmhacht intinne nó gealtachta agus nach dtuigeann sé/sí na himpleachtaí a bhaineann leis an bpósadh. Sa bhreis ar sin, má aontaíonn duine pósadh de bharr bagartha nó imeaglaithe, d'fhéadfadh sé go mbeadh a t(h)oil samhalta neamhbhailí agus mar sin nach mbeadh aon phósadh ann.
- cloí leis na rialacha cuí Bealaí Éagsúla Dleathacha chun Pósadh
A bheith in ann pósadh
- Go dleathúil le bheith in ann pósadh, ní mór don bheirt agaibh na rialacha ar fad seo a leanas a shásamh ag am an tsearmanais. Ní mór don bheirt:
- a bheith ós cionn 18 nó Ordú Diolúine Chúirte a bheith acu muna bhfuil Coinníollacha Aoise
- fógra 3 mhí a bheith tugtha don Chláraitheoir nó Ordú Diolúine Chúirte a bheith acu muna bhfuil an fógra sin tugtha. Riachtanais Fógra
- a bheith singil, ina b(h)aintreach, nó colscartha in Éirinn nó aon phósadh eile a bheith curtha ar neamhní ag an Stát nó colscaradh bailí ón iasacht a bheith acu. Stádas Pósta
- fear agus bean a bheith i gceist - deireann an dlí go bhfuil an gnéas céanna ag duine i gcaitheamh a s(h)aoil agus a bhí aige/aici nuair a rugadh é/í, fiú má bhí na hathruithe leighis chuí aige/aici ina dhiaidh sin lena g(h)néas a athrú.
- a bheith in ann de mheabhair impleachtaí an phósta a thuiscint
- gan aon ghaol fola nó pósta a bheith acu lena chéile a chuireann bac dleathúil orthu pósadh. Má tá gaol agat leis an duine gur mian leat pósadh, gaol fola nó pósta, ba cheart duit teagmháil a dhéanamh le dlíodóir le cinntiú nach dtiteann sibh taobh istigh den teorainn ghaoil nach bhfuil ceadaithe.
Más rud é nach gcomhlíonann ceachtar den bheirt aon cheann de na coinníollacha thuas agus má théann siad ar aghaidh le searmanas níl aon stádas dleathúil ag an bpósadh sin.
Níl aon ghá a thuilleadh le cead tuismitheoirí a fháil le pósadh is cuma cén aois iad na daoine gur mian leo pósadh.
Tuilleadh eolais
Colanna pósta
Eolas
Tá colanna ar phósadh idir daoine áirithe a bhfuil gaol fola eatarthu nó gaol pósta acu le chéile. Ní cheadaítear do lánúin laistigh de na colanna pósadh. Tá na colanna seo bunaithe ar:
- gaol fola – gaol fuilbhunaithe, leathfhola san áireamh (bheith ag roinnt tuismitheora amháin an chiall atá le leathfhuil, leasdeartháir mar shampla)
- cleamhnas – gaol trí phósadh.
Tá colanna ar go leor gaolta clainne, lena n-áirítear sliocht de bharr pósta agus sliocht nach de bharr pósta iad.
Tá na colanna seo i bhfeidhim maidir le leanbh uchtaithe agus a m(h)uintir nádúrtha agus a t(h)uismitheoirí uchtaithe. Is cosúil, áfach gur féidir le leanbh uchtaithe duine de shliocht a t(h)uismitheoirí uchtála a phósadh.
De réir The Deceased Wife’s Sister Act 1907 agus the Deceased Husband’s Widow’s Marriage Act 1921 ceadaítear d'fhear deirfiúr a mhná céile básaithe a phósadh agus ceadaítear do bhean deartháir a fir chéile a phósadh. De réir chinneadh na hArd Cúirte i nDeireadh Fómhair 2006, má thagann deireadh le pósadh de bharr colscartha seachas de bharr báis ní bheidh na colanna seo i bhfeidhm a thuilleadh.
Níl aon srian dlíthiúil ar phósadh idir col ceathracha.
Rialacha
Gaol Fola – Gaolta fuilbhunaithe
Ní ceadmhach d'fhear na daoine muinteartha seo a phósadh:
- A Sheanmháthair
- A Mháthair
- Deirfiúr a Athar (aint)
- Deirfiúr a Mháthar (aint)
- A Dheirfiúr
- Iníon a Athar (leas deirfiúr)
- Iníon a Mháthar (leas deirfiúr)
- A Iníon
- Iníon a Mhic (gariníon)
- Iníon a Iníne (gariníon)
- Iníon a Dhearthár (neacht)
- Iníon a Dheirféar (neacht)
Ní ceadmhach do bhean na daoine muinteartha seo a phósadh:
- A Seanathair
- A hAthair.
- Deartháir a hAthar (uncail)
- Deartháir a Máthar (uncail)
- A Deartháir
- Mac a hAthar (leasdeartháir)
- Mac a Máthar (leasdeartháir)
- A Mac
- Mac a mic (garmhac)
- Mac a hIníne (garmhac)
- Mac a Dearthár (nia)
- Mac a Deirféar (nia)
Cleamhnas – gaol trí phósadh.
Ní ceadmhach d'fhear na daoine muinteartha seo a phósadh:
- Bean chéile a Sheanathar (leas-seanmháthar)
- Bean chéile a Athar (leasmháthair)
- Bean chéile Dheartháir a Athar
- Bean chéile Dheartháir a Mháthar
- Bean chéile a Mhic
- Bean chéile Mhac a Mhic
- Bean chéile Mhac a Iníne
- Bean chéile Mhac a Dhearthár
- Bean chéile Mhac a Dheirféar
- Seanmháthair a Mhná céile (seanmháthair chéile)
- Máthair a Mhná céile (máthair chéile)
- Deirfiúr Athair a Mhná céile
- Deirfiúr Mháthair a Mhná céile
- Iníon a Mhná céile (leasiníon)
- Iníon Mhac a Mhná céile.
- Iníon Iníon a Mhná céile
- Iníon Dheartháir a Mhná céile
- Iníon Dheirfiúr a Mhná céile
Ní ceadmhach do bhean na daoine muinteartha seo a phósadh:
- Fear céile a Seanmháthar (leas-seanathair)
- Fear céile a Máthar (leasathair)
- Fear céile Dheirfiúr a hAthar
- Fear céile Dheirfiúr a Máthar
- Fear céile a hIníne
- Fear céile Iníon a Mic
- Fear céile Iníon a hIníne
- Fear céile Iníon a Dearthár
- Fear céile Iníon a Deirféar
• Seanathair a Fir chéile (seanathair céile) - Athair a Fir chéile (athair céile)
- Deartháir Athair a Fir chéile
- Deartháir Mháthair a Fir chéile
- Mac a Fir chéile (leasmhac)
- Mac Mhac a Fir chéile
- Mac Iníon a Fir chéile
- Mac Dheartháir a Fir chéile
- Mac Dheirfiúr a Fir chéile
Teanga
Ábhar Gaolmhar
- Réamhriachtanais dhlíthiúla do pháirtnéireacht shibhialta
Cuireann an chaipéis seo síos ar na réamhriachtanais dhlíthiúla a chaithfidh an dá pháirtí a chomhlíonadh chun an cumas dlíthiúil a bheith acu dul isteach i bpáirtnéireacht shibhialta. Má tá cumas in easnamh faoi aon cheanteideal bheadh an phairtnéireacht shibhialta curtha ar neamhní go dlíthiúil in Éirinn. - Uchtú
Cur síos ar an gcóras altamais in Éirinn. San áireamh tá an córas a bhaineann le páiste ag thógáil ar altramas sa tír seo agus ón iasacht. - Ceapadh Atharthachta
Cur síos ar an rial ceapadh atharthachta i gcásanna pósta agus neamhphósta agus toradh an riail seo ar chearta páistí do oidhreacht agus cothú.
Téigh i dteagmháil linn
Má tá ceist agat a bhaineann leis an ábhar seo, is féidir leat glao a chur ar an tSeirbhís Ghutháin um Fhaisnéis do Shaoránaigh 0761 07 4000 (Luan go hAoine idir 9rn agus 9in) no trí bhualadh isteach san Ionad Faisnéise do Shaoránaigh is gaire duit.