Caomhnadh leanaí i gcás lánúineacha neamhphósta

Rialacha

De réir dlí is í an mháthair neamhphósta caomhnóir aonair an linbh a rugadh taobh amuigh de phósadh. Muna n-aontaíonn an mháthair an dearbhú reachtúil a shíniú, caithfidh an t-athair neamhphósta iarratas a dhéanamh ar an gcúirt chun a bheith ina chaomhnóir dlíthiúil dá leanbh. Chomh luath agus a bhíonn sé ina chaomhnóir dá leanbh d'fhéadfadh sé iarratas a dhéanamh ar chaomhnadh nó rochtain.

Go ginearálta, bíonn claonadh ag an gcúirt breithniú a dhéanamh sa chás nach bhfuil tuismitheoirí an linbh pósta, gurbh é leas an linbh a bheith ina chónaí lena mháthair. Tá seasamh dlíthiúil níos fearr ag an máthair seachas mar atá ag an athair neamhphósta agus go hiondúil tugtar caomhnadh an linbh di.

Go hiondúil tugann an chúirt áfach, ceart rochtana, don athair neamhphósta ionas go mbeidh deis aige teagmháil rialta a bheith aige leis an leanbh.

Muna dteastaíonn caomhnadh an linbh ón máthair neamhphósta agus go bhfuil sé ar intinn aici ligean don leanbh a uchtú, is féidir leis an athair neamhphósta iarratas a dhéanamh fós ar chaomhnadh an linbh. Is é leas an linbh an cheist is tábhachtaí don chúirt agus socrú á déanamh aici faoin gcaomhnadh a bheith ag an athair. Beidh an t-achar ama a chaith an leanbh leis na tuismitheoirí altramais ina phríomh ghné den scéal.