An chaoi a n-athraíonn páirtnéireacht shibhialta do stádas dlíthiúil

Eolas

Is conradh ceangailteach dlíthiúil sibhialta atá i bpáirtnéireacht shibhialta. Ardaíonn dul isteach i bpáirtnéireacht shibhialta go leor cúinsí dlíthiúla fadiarmhartacha atá cosúil go ginearálta leis na cúinsí dlíthiúla i bpósadh. Athraíonn sé do staid dhlíthiúil, fiú i ndiaidh báis.

Athraíonn páirtnéireacht shibhialta do theidlíochtaí agus d’oibleagáidí i ndáil le:

• Leasa Shóisialaigh
• Cáin
• Árachas Saoil agus Pinsin
• Oidhreachtúlacht
• Cothabháil
• Comhtheach
• Orduithe Urchoisc, Sábháilteachta agus Cosanta

Cúinsí eile de pháirtnéireacht shibhialta

Dliteanas sibhialta: d’fhéadfaí go bhfuil páirtnéir sibhialta in ann agair mar gheall ar bhás éagórach a p(h)áirtnéir sibhialta, áit ar chúis a b(h)áis neamart nó éagóir dhuine eile agus a raibh gortú nó anbhuain meabhrach ar an marthanóir mar thoradh air.

Meabhairshláinte: is féidir le páirtnéir sibhialta cur isteach ar iontráil ainneonach chuig institiúid shiciatrach do pháirtnéir sibhialta a bhfuil galar intinne air (ar choinníoll nach bhfuil na páirtithe scartha agus ar choinníoll nach bhfuil sé ina ábhár d’iarratas faoi na hAchtanna um Fhoréigin Baile).

Cumhacht aturnae: caithfear páirtnéir sibhialta a bheith curtha ar an eolas faoi chlárú cumhacht aturnae seasmhach. Ar an gcaoi chéanna, scoirtear bailíocht chumhacht aturnae seasmach i bhfábhar pháirtnéir sibhialta má dhíscaoiltear an pháirtnéireacht nó tá ordú sábháilteachta nó urchoisc in aghaidh an pháirtnéir sibhialta.

Aighnis réadmhaoine: féadfaidh páirtnéir sibhialta cur isteach chuig na cúirteanna do chinneadh i ndáil le haighnis faoi réadmhaoin idir é agus a p(h)áirtnéir.

Tionóntachtaí: Faoin Acht Tionóntachtaí Cónaitheacha 2004 féadfaidh páirtnéir sibhialta teacht i gcomharbacht ar thionóntacht ar bhás a p(h)áirtnéara.

Iarcheilí a théann isteach i bpáirtnéireachtaí sibhialta

Go héifeachtúil, cailleann iarchéilí a théann isteach i bpáirtnéireachtaí sibhialta a stádas mar iarchéilí. Faoin reachtaíocht cholscartha, leantar leis an gceart atá ag iarchéilí cur isteach chuig na cúirteanna ar orduithe cothábhála agus réadmhaoine. Nuair a théann siad isteach i bpáirtnéireachtaí sibhialta, áfach, athraíonn sé seo. Téann orduithe cothabhála agus orduithe coigeartaithe pinsin i bhfábhar iarchéile i léig má théann an chéile sin isteach i bpáirtnéireacht shibhialta. Ní fhéadfaidh go ndéanfaí ordú coigeartaithe réadmhaoine ar leas an iarchéile má tá an chéile sin cláraithe i bpáirtnéireacht shibhialta.