An tOmbudsman do Leanaí

Eolas

Is oifig reachtúil í an tOmbudsman do Leanaí in Éireann arna bhunú faoin Acht umOmbudsman do Leanaí 2002. Is iad príomhfheidhmeanna na hOifige ná:

• cearta agus leas leanaí a chur chun cinn agus
• gearáin déanta ag leanaí nó thar ceann leanaí i gcoinne comhlachtaí poiblí, scoileanna nó ospidéil phoiblí a imscrúdú

Tá Ombudsman do Leanaí ag cuid mhaith tíortha. Bunaíodh roinnt de na hoifigí neamhspleácha seo ó glacadh leis An Coinbhinsiún um Chearta an Linbh (pdf).

Sa dhá mhí dhéag, Aibreán 2004 – Márta 2005, fuair Oifig an Ombudsman 177 gearán. I rith na tréimhse Aibreán 2005 – Nollaig 2005, fuarthas 278 gearán breise.

Cé a ndéanann an tOmbudsman do Leanaí ionadaíocht orthu?

Go ginearálta, faoin Acht, is ionann leanbh agus duine atá faoi ocht mbliana déag d’aois ach nach n-áirítear comhaltaí d’Óglaigh na hÉireann atá faoi ocht mbliana déag leis.

Cé hiad na comhlachtaí ar féidir leis an Ombudsman iad a imscrúdú?

I measc na gcomhlachtaí ar féidir iad a imscrúdú tá; ranna rialtais, boird sláinte, údaráis áitiúla, scoileanna, ospidéil phoiblí agus an tseirbhís príosúin.

Cé hiad na comhlachtaí nach féidir iad a imscrúdú?

Faoin Acht um Ombudsman do Leanaí ní thagann réimsí ar nós na cúirteanna, na Gardaí, an próiseas tearmainn, an Bord Uchtála agus gníomhaireachtaí um chaidreamh oibreachais faoi imscrúdú an Ombudsman. Beidh sé i gceist cúraim an Ombudsman a mhéadú chomh fada le cuid de na comhlachtaí san earnáil dheonach agus phríobháideach amach anseo.

Cén chaoi ar féidir leis an Ombudsman do Leanaí cearta agus leas leanaí a chur chun cinn?

Féadfaidh an tOmbudsman do Leanaí, chun cearta agus leasa an linbh a chur chun cinn, comhairle a chuir ar fáil don Rialtas, forbairt ar bheartais, cleachtais agus nósanna imeachta chun cearta agus leas leanaí a chur chun cinn a spreagadh, béim a leagan ar shaincheisteanna a bhaineann le leanaí agus athbhreithniú agus faireachán a dhéanamh ar oibriú na reachtaíochta chomh fada is a bhaineann sé le leanaí.