Breith do Linbh a Chlárú

Rialacha

Féadfar breith a chlárú in oifig aon Chláraitheora Breitheanna, Póstaí agus Básanna , is cuma cár rugadh an leanbh. (Má rugadh an leanbh roimh 5 Nollaig 2005 ní mór an bhreith a chlárú sa Cheantar Cláraithe inar rugadh an leanbh.) Inseoidh foireann an ospidéil inar rugadh do leanbh nó oibrithe d'ionad sláinte áitiúil duit cén áit ar féidir leat an breith a chlárú.

Tugann Foirm Dearbhaithe Breithe (Foirm BNF/01) léargas ar an fhaisnéis atá le taifeadadh sa Clár Breitheanna, agus ba chóir do thuismitheoir amháin, nó don bheirt acu, é a chomhlánú le cinntiú nach gcláraítear aon rud ach fhaisnéis chruinn cheart. Tugtar an fhoirm seo don mháthair san ospidéal agus ba chóir é a chomhlánú agus thabhairt ar ais d'fhoireann an ospidéal sula scaoiltear amach í.

Is ar na sonraí a sholáthraíonn faisnéiseoir cáilithe a dhéantar an bhreith a chlárú, agus tá se de dhualgas ar an duine seo freastal ar Oifig an Chláraitheora chun Clár na mBreitheanna a shíniú. Is iad athair agus máthair an linbh na príomhfhaisnéiseoirí cáilithe agus moltar dóibh bheith i láthair ag clárú na breithe más féidir é. Mura ndéanann na tuismitheoirí é seo, nó mura bhfuil sé ar a gcumas é a dhéanamh, féadfaidh na daoine seo a leanas gníomhú mar fhaisnéiseoirí cáilithe:

• ball ainmnithe d'fhoireann an ospidéil (nó na hinstitiúide, na heagraíochta nó an fhiontair) inar rugadh an leanbh
• duine a bhí i láthair ag an mbreith
• duine a bhí i láthair san áitreabh inar rugadh an leanbh
• duine atá i bhfeighil an linbh
• duine a cheapadh mar chaomhnóir an linbh.
• duine a ndearna cúirt ordú faoi nó fúithi gurb eisean nó ise tuismitheoir an linbh.

Tá roghanna éagsúla cláraithe ann, sonraí faoin athair san áireamh, nuair nach bhfuil an mháthair agus an t-athair pósta. (Tá foirmeacha nua á gcur ar fáil ach tá na seanchinn fós in úsáid.) Is iad seo a leanas na roghanna atá ann:

• Féadfaidh an t-athair agus an mháthair freastal le chéile ag Oifig an Chláraitheora agus an clár a shíniú le chéile.
• Féadfaidh an mháthair foirm dearbhaithe ag tabhairt ainm an athar a chomhlánú agus é a thabhairt léi mar aon le dearbhú ó athair an linbh ag admháil gurbh eisean athair an linbh. Síníonn an mháthair an clár.
• Féadfaidh an t-athair foirm a chomhlánú ag admháil gurb eisean athair an linbh, agus féadfaidh sé dul go hOifig an Chláraitheora é féin agus dearbhú na máthar á ainmniú mar athair a bhreith leis.
• Féadfaidh an t-athair nó an mháthair iarratas i scríbhinn a dhéanamh ar Fhoirm S.C 5 agus Foirm S.C.6 faoi sheach) ar sholáthair cóip deimhnithe d'ordú cúirte a ainmníonn an duine atá le clárú mar athair an linbh. Beidh ar an tuismitheoir atá ag déanamh an iarratais a bheith i láthair ag Oifig an Chláraitheora chun Clár na mBreitheanna a shíniú.
• Má tharlaíonn sé go bpósann tú i ndiaidh breith do linbh, agus mura bhfuil ainm an athar ar Chlár na mBreitheanna, féadfaidh tú an breith a athchlárú. Is féidir sloinne an linbh a athrú anois faoi fhorálacha An Acht Leasa Shóisialaigh (Forálacha Ilghnéitheacha) 2002 , más rud é go bhfuil an lánúin ag athchlárú na breithe chun sonraí an athar a chur ar fáil. Baineann sé seo le cláruithe a rinneadh idir Deireadh Fómhair 1997 agus feidhmiú na reachtaíochta i Deireadh Fómhair 2002. Ní féidir sloinne an linbh a athrú, áfach, má rinneadh taifead ar shonraí an athar sa chlárú bunaidh. Ní féidir sloinne an linbh a athrú ach amháin ar iarratas comhpháirteach na beirte tuismitheoir.

Is féidir sonraí an athar a iontráil, fiú má tá an mháthair pósta le duine eile. Má rugadh an leanbh ar 5 Nollaig 2005 nó ina dhiaidh sin, is féidir le tuismitheoirí a phósann a chéile i ndiaidh na breithe a stádas pósta nua a léiriú trí an bhreith a athchlárú. Déantar an fhaisnéis seo a leanas a thaifead i gClár na Breitheanna:

• Sloinne. Ó Dheireadh Fómhair 1997 i leith déantar sloinne a thaifead don leanbh nuair atá an bhreith á chlárú. Ní foláir gurb é sloinne an athar, nó na máthar, nó na beirte acu an sloinne a chláraítear. Más mian leat sloinne eile seachas sloinne an athar nó na máthar nó na beirte acu a bheith ag an leanbh, ní mór duit iarratas a dhéanamh i scríbhinn chuig an Ard-Chláraitheoir nó chuig Príomh-Chláraitheoir.
• Am, dáta agus áit bhreithe an linbh
• Inscne an linbh
• Uimhir Phearsanta na Seirbhísí Poiblí an linbh
• Ainm(neacha) agus Sloinne an linbh.
• Ainm(neacha) agus Sloinne na máthar
• Sloinne breithe na máthar
• Gach sloinne eile a bhí ag an máthair má bhí a leithéidí aici.
• Gnáthslí bheatha na máthar
• Gnáthseoladh na máthar ag am na breithe
• Dáta breithe na máthar
• Stádas pósta na máthar
• Uimhir Phearsanta na Seirbhísí Poiblí na máthar
• Sloinne breithe máthar na máthar
• Déantar faisnéis den sórt céanna a iontráil i gcás an athar.

Is é an Bord Uchtála a dhéanfaidh an clárú má tá leanbh uchtaithe agat ó Éirinn nó ó thír thar lear. Féach ar Leanbh a Uchtú agus Uchtáil Idir thíortha chun breis eolais a fháil.