Do theaghlach breithe a lorg

Eolas

Más uchtleanbh nó leanbh altrama a bhí ionat d'fhéadfadh sé go mbeadh sé deacair agus go deimhin goilliúnach ort do theaghlach breithe a lorg agus is cinnte go bhfuil sé deacair fios a bheith agat cén áit gur ceart tús a chur leis an gcuardach. Ach, tá bealaí faoi leith gur ceart tabhairt faoin obair seo le hiarracht a dhéanamh teacht ar do theaghlach agus tá go leor eagraíochtaí tacaíochta ann gur féidir leo comhairle phraiticiúil a chur ort.

Níl aon lárionad amháin ann ina bhfuil comhaid uchtála ar fáil sa tír seo agus mar sin d'fhéadfadh sé go mbeadh ort iarratas a dhéanamh chuig roinnt eagraíochtaí éagsúla leis an eolas a theastaíonn uait a fháil. Ba cheart duit ar dtús báire teagmháil a dhéanamh leis an ngníomhaireacht uchtála a bhí freagrach as tú a chur san áit ina bhfuil cónaí ort. Ba cheart go mbeadh comhad ag an eagraíocht sin a bhaineann leat agus d'fhéadfadh sé go mbeadh eolas ann cé as ó thús thú.Is cumann uchtála cláraithe nó do Limistéar Fheidhmeannacht na Seirbhíse Sláinte (FSS) a bheidh i gceist anseo

Ar an 1 Eanáir 2005 tháinig Limistéir Fheidhmeannacht na Seirbhíse Sláinte (FSS) i bhfeidhm in Éirinn in ionad 'bhoird sláinte'. Tá taifid 'boird sláinte' fós ag na Limistéir FSS seo. (San am atá thart, láimhseáil na boird sláinte uchtuithe). Ba chóir go mbeadh comhad ag an ngníomhaireacht uchtála ar d'uchtú a d'fhéadfadh eolas a bheith ann faoi cé as ar tháinig tú.

Nuair a théann tú chuig gníomhaireacht uchtála nó chuig Limistéir Fheidhmeannacht na Seirbhíse Sláinte (FSS) maidir le do theaghlach breithe a lorg iarrfar ort foirm a chomhlánú le sonraí bunúsacha maidir leat féin. Tá liosta fada feithimh ag formhór na n-gníomhaireachtaí de dhaoine atá ag iarraidh a dteaghlaigh bhreithe a lorg agus d'fhéadfadh sé go mbeadh ort a bheith foighneach leo. Nuair a bhíonn deis acu tiocfaidh oibrí sóisialta chugat ón údarás agus iarrfar ort teacht isteach le haghaidh cruinnithe. Ar do chéad chuairt ba cheart duit iarraidh faoin bpolasaí atá ag an údarás maidir le teaghlaigh bhreithe a lorg. Ba cheart duit a fháil amach cé chomh fada a thógann sé teaghlach a aimsiú agus cén cineál tacaíochta gur féidir leis an údarás a chur ar fáil duit. Ní ceart duit a bheith ag súil le go leor eolais ar dtús. Go hiondúil ní thabharfaidh na húdaráis ach eolas nach féidir daoine a aithint uaidh (ní thabharfar ainmneacha iomlána ná seoltaí duit), ach amháin sa chás go bhfuil na páirtithe ar fad sásta é sin a dhéanamh.

Más rud é go bhfuil an ghníomhaireacht a bhí ag plé le do chás dúnta anois beidh do chód curtha chuig an Limistéir FSS chuí. Más amhlaidh atá ba cheart duit na céimeanna céanna a bheadh tógtha agat le gníomhaireacht uchtála a thógáil: déan teagmháil leis an Limistéir FSS agus inis dóibh go bhfuil tú ag lorg do theaghlach breithe.

Is féidir leat do theaghlach breithe a lorg leat féin nó le cúnamh ó bhleachtaire príobháideach agus déanann roinnt daoine cinneadh tabhairt faoi ar an mbealach seo. Ach, ní mholann na hudaráis uchtála é seo. Molann siad gur ceart aon chuardach a dhéanamh ar bhealach smachtaithe le cinntiú nach gcuirtear brú ar cheachtar de na páirtithe rudaí a dhéanamh nach mian leo nó nach bhfuileadar in ann deileáil leo.

Uchtáil

Más duine thú a bhí ina (h)uchtleanbh níl aon chearta dlíthiúla ag do theaghlach breithe maidir leat agus níleadar freagrach asat níos mó. Glacann an t-ucht-theaghlach leis an bhfreagracht seo. Eisítear teastas breithe nua duit in ainm do theaghlaigh nua agus cuirtear d'ainm ar Chlár na bPáistí Uchtála. Is iad na cumainn chláraithe uchtála agus na Limistéir FSS amháin atá in ann páistí a chur ar fáil do ucht-theaghlaigh.

Ar an 3 Bealtaine 2005, sheol an Bord Uchtála clár náisiúnta roghnú teagmhála uchtála (National Adoption Contact Preference Register). Is é an cuspóir atá leis an gClár ná teagmháil idir dhaoine uchtaithe agus a dteaghlach nádúrtha a éascú.

Tá rannpháirtíocht roghnach agus ní chuirfear tús le teagmháil tríd an gclár ach áit a bhfuil an dá pháirtí cláraithe. Ceadaíonn an Clár duit a roghnú cén leibhéal teagmhála ar mhian leat a bheith agat. Féach tuilleadh eolais ar an gclár náisiúnta roghnú teagmhála uchtála (National Adoption Contact Preference Register) anseo .

Altramas

D'fhéadfadh sé gur cuireadh thú go fadthéarmach chuig teaghlach ar altramacht de bharr cúiseanna éagsúla nach raibh tú in ann maireachtáil le do theaghach féin. Ach, go dlíthiúil is cuid dá dteaghlaigh féin i gcónaí iad páistí ar altramacht agus tá do Limistéir FSS áitiúil freagrach astu ar feadh an ama atá siad ar altramacht. Ba cheart go mbeadh sonraí ag an mbord sláinte maidir leis an áit inár cuireadh tú agus maidir le do theaghlach féin. Más amhlaidh go ndeachaigh tú ar altramacht roinnt blianta ó shoin d'fhéadfadh sé nach mbeadh na taifid atá ann ón am sin chomh maith leis na taifid nach mór a choinneáil sa lá inniu. Chomh maith leis sin más rud é nár choinnigh do theaghlach i dteagmháil leat, le do theaghlach altrama nó leis an Limistéir FSS áitiúil, d'fhéadfadh sé go mbeadh sé deacair do theaghlach féin a lorg tar éis tréimhse ama a bheith caite.

Uchtáil Neamhdhleathach

Más rud é nach uchtáil dlíthiúil a bhí ann, molann an Bord Uchtála duit iarratas a chur chuig an Limistéir FSS sa cheantar ina raibh cónaí ort i do pháiste. D'fhéadfadh sé go mbeadh sé in ann cúnamh a thabhairt duit do theaghlach breithe a lorg ós rud é go bhfuil chuile sheans ann go raibh baint aige le thú a thabhairt chuig teaghlach eile nó go raibh sé ar an eolas maidir le do chás. D'fhéadfadh sé go mbeadh do theastas breithe fós agat le sonraí maidir le d'áit bhreithe. D'fhéadfadh sé seo a bheith ina chúnamh má tá taifid coinnithe ag ospidéil ón tréimhse inár rugadh thú. Is féidir tuilleadh eolais ar do theaghlach breithe a lorg más rud é nach uchtáil dlíthiúil a bhí ann ach teagmháil a dhéanamh leis an mBord Uchtála nó le cuid de na heagraíochtaí tacaíochta uchtála atá luaite thíos.

D'athair breithe a lorg

Má dhéanann tú cinneadh d'athair breithe a lorg is iondúil go mbeidh ort teagmháil a dhéanamh ar dtús le do mháthair bhreithe. Is minic nach mbíonn ainm an athar bhreithe luaite ar an teastas breithe agus is í do mháthair bhreithe an t-aon duine a bheidh in ann é a ainmniú. Má tá a ainm luaite ar an teastas breithe ba cheart duit teagmháil a dhéanamh leis an mBord Uchtála nó leis an ngníomhaireacht uchtála a raibh plé aige le do chás le comhairle a fháil. Ní moltar d'aon duine dul i dteagmháil leis an teaghlach breithe é/í féin gan cúnamh agus comhairle phroifisiúnta. Bheadh seo amhlaidh agus athair breithe a bheith ag lorg páiste leis a tugadh le huchtáil. Ní mór a bheith fíor chúramach le cinntiú go bhfuil an páiste (agus na hucht-tuismitheoirí, más cuí) réidh le castáil leis an athair breithe agus sásta é sin a dhéanamh. Má theastaíonn tuilleadh eolais uait maidir le do pháiste féin a lorg ba cheart duit teagmháil a dhéanamh leis an ngníomhaireacht uchtála nó Limistéir FSS a bhí ag plé leis an gcás. Muna bhfuil an t-eolas sin agat beidh an Bord Uchtála in ann cuidiú leat. Má bhíonn tú ag iarraidh aon athrú a dhéanamh ar d'ainm dlíthiúil (mar shampla, ainm d'athar bhreithe nó do mháthar breithe a thógáil) beidh ort é sin a dhéanamh le gníomhas aonpháirtí.

Comhairle

Ní ceart ceapadh go mbeidh sé éasca ort deileáil leis na mothúcháin a thiocfaidh chun solais agus tú ag lorg do theaghlach breithe agus ba cheart duit a bheith réidh don phróiséas roimh duit dul ina bhun. Cuireann an chuid is mó gníomhaireachtaí agus Limistéir FSS seirbhísí comhairle ar fáil do dhaoine atá ag lorg a dteaghlach agus moltar duit labhairt le hoibrí sóisialta roimh duit tús a chur leis an bpróiséas agus lena linn. Tá go leor grúpaí tacaíochta agus féin-chabhrach ar fáil do dhaoine a bhí ina n-uchtleanaí nó a thug suas a gcuid páistí le huchtáil. Cuireann siad go leor eolais agus comhairle ar fáil ó dhaoine atá imithe tríd na córais seo iad féin.

Toradh ar iarrachtaí daoine a lorg

Tá roinnt rudaí gur féidir tarlú má lorgaíonn tú do theaghlach breithe. D'fhéadfadh sé go n-éireoidh leat do mháthair/athair breithe a fháil nó páiste a thug tú le huchtáil agus go dtiocfaidh sibh le chéile arís. Ar an lámh eile d'fhéadfadh sé go n-éireoidh leat teacht orthu ach nach mbeadh fonn orthu castáil leat. B'fhéidir go bhfuileadar básaithe roimh duit teacht orthu nó seans a fháil castáil leo. Nó, d'fhéadfadh sé tarlú nach n-éireoidh leat ariamh teacht ar an duine atá dhá lorg agat. Tá níos mó seans ann gurb é seo a tharlóidh má tá tú ag brath ar thaifid ó na 1930aidí, 1940aidí, 1950aidí nó 1960aidí mar gheall ar a laghad eolais atá coinnithe sna comhaid sin. Tá a gcuid fadhbanna féin ag baint le gach ceann de na torthaí seo. Is féidir go leor cúnamh a fháil ó labhairt le comhairleoirí proifisiúnta nó le daoine eile a bhfuil taithí den chineál céanna acu ina saoil le deileáil le do mhothúcháin ag an am seo.

Teacht le chéile arís

Má éiríonn leat teacht ar do theaghlach breithe agus má aontaíonn gach duine castáil lena chéile beidh oraibh ansin am agus áit a shocrú. Moltar duit gur ceart don oibrí sóisialta feidhmiú mar éadránaí idir thú féin agus do mháthair bhreithe mar shampla. D'fhéadfadh sé go mbeadh sé ina chúnamh an tríú duine neamhspléach a bheith i láthair le sibh a chur in aithne agus teannas a laghdú. Ba cheart daoibh castáil lena chéile in áit phríobháideach agus ní ceart go mbeadh an chéad chruinniú ró-fhada, dhá uair an chloig mar shampla. D'fhéadfadh sé a bheith ina chúnamh litreacha, grianghrafanna nó eolas maidir libh féin a bheith curtha chuig a chéile roimh an chéad chruinniú. Labhair leis an oibrí sóisialta maidir leis seo. Ná bí ag súil leis an iomarca ón gcéad chruinniú. Is féidir leis a bheith deacair ar gach duine agus ní gá go mbeidh tionchar aige ar an gcaoi a mbeidh bhur gcaidreamh sa todhchaí.

Caidreamh a chothú

Ní gá go bhfásfaidh caidreamh as castáil lena chéile arís, roinnt daoine, níl uathu ach an chéad chruinniú. Beidh daoine eile ag súil le caidreamh a fhorbairt leis an duine atá díreach tagtha ar ais ina saol. D'fhéadfadh sé go mbeadh sé seo go maith ach, beidh fadhbanna le sárú freisin. Ba cheart duit a bheith réidh le deileáil leis na tréanmhothúcháin agus bí cinnte go dtuigeann an t-ucht-teaghlach nó teaghlach altrama a bhfuil ag tarlú duit. Is féidir leo sin a bheith ina bhfoinse tacaíochta ach b'fhéidir go mbeidh sé deacair dóibh go hiomlán tuiscint gach rud atá ag tarlú duit. Beidh tacaíocht ar fáil duit ón oibrí sóisialta nó ó na grúpaí tacaíochta agus féin-chúnamh atá luaite thíos.